RMV, 364 raste të reja, janë propozuar 3 masa të reja për parandalimin e përhapjes së Kovid-19

3 rekomandime për masa të reja restriktive i ka dërguar Ministria e Shëndetësisë deri në Qeverinë e RMV-së për dhënien e dritës jeshile, Filipçe tha se tashmë ndodhemi në valën e vjeshtës ku ka rrezik real për eskalim të situatës, ai shtoi se spitalet janë të gatshme për çfarëdo situate, shkruan Portalb.mk.

Cilat janë masat që i ka propozuar Ministria e Shëndetësisë?

• Ndalesë për grumbullime të mëdha familjare apo festa në kushte shtëpiake. Respektivisht, në një shtëpi përveç banorëve do të mund të pranohen vetëm 4 persona tjerë, jo më shumë.
•          Ndalohet grupimi i qytetarëve në hapësira publike pas orës 22:00, që i bije se më shumë se 4 persona nuk do të mund të shoqërohen në hapësira publike apo private.
•      Mbajtja e maskës, shallit, maramës apo diçka që do të mbulonte pjesën e fytyrës, gjegjësisht gojës dhe hundës do të jetë e obligueshme edhe jashtë, pra në vende të hapura.

Ministri i Shëndetësisë Venko Filipçe tha se aktualisht ka qytete në RMV të cilat i kanë përmbushur kapacitetet e tyre, që dmth se nuk kanë më shumë vend për pranimin e pacientëve të rinj dhe nga këto qytete pacientët dërgohen në Shkup.

Kapacitetet e spitaleve janë përmbushur gjithsej në Kumanovë, Prilep dhe Manastir. Megjithatë, po bëhen gati hapësira të reja ku do të trajtohen pacientët pozitiv me virusin korona, në Koçani për shembull ka 60 krevat të pashfrytëzuar për pacientet me kovid-19, ka vende në Kavadarci, Tetovë etj.

Ndërkaq gjatë 24 orëve të fundit janë regjistruar numër rekord i rasteve të reja me kovid-19, bëhet fjal për gjithsej 364 raste të reja nga gjithsej 2140 teste të kryera, si pasojë e sëmundjes kovid-19 kanë ndërruar jetë 3 persona. Ndërsa 106 pacientë janë regjistruar si të shëruar.

Për këtë, Filipçe tha se situata me virusin korona është serioze dhe edhe pse momentalisht mund të duket stabile, ka gjasa që ajo të eskaloje në çdo moment andaj kërkon përkrahjen e qytetarëve që të zbutet kriza.

“Vjeshta erdhi ndërkaq situata me virusin korona është shumë serioze, Evropa dhe shtetet tjera po mbyllen. Si do të shkoje situata me virusin te ne varet krejtësisht prej qytetarëve, sa do ti respektojnë masat që janë në fuqi. Sistemi shëndetësor është gati për tu përballur me virusin, na duhet përkrahje nga qytetarët.