Greqi, 2 të vdekur dhe një i zhdukur nga stuhia
Dy persona kanë humbur jetën dhe një është zhdukur në rajonin e Greqisë qendrore të Thesalisë pasi një stuhi goditi disa pjesë të vendit gjatë natës dhe shkaktoi përmbytje, transmeton Anadolu Agency (AA).
Autoritetet identifikuan dy viktimat si një grua e moshuar e cila u gjet e vdekur në shtëpinë e saj të përmbytur dhe një bari 63-vjeçar i cili u përfshi nga përmbytjet.
Ata thanë se një grua e cila injoroi udhëzimet e zjarrfikësve dhe policisë për të mos kaluar në një zonë ku një urë u përfshi nga uji i lumit është zhdukur.
Shërbimi i zjarrfikësve tha se ka pranuar pothuajse 2.500 thirrje nga banorët e bllokuar në Greqinë qendrore dhe perëndimore ose në lidhje me heqjen e pemëve të rëna që bllokonin rrugët apo kishin shkaktuar dëme materiale. Shërbimi raportoi se ka shpëtuar më shumë se 600 persona.
Operatori i trenave në Greqi, Trainose, tha se shërbimi që lidh Greqinë jugore dhe veriore ishte pezulluar.
Uji nga një lumë që doli nga shtrati i tij dëmtoi të paktën dy ura dhe disa ndërtesa, përfshirë qendrën lokale të shëndetit në qytetin Mouzaki të Thesalisë, e cila është shembur. Pjesët e zonës së goditur janë pa energji elektrike.
