Rama: Nga nesër hiqen fashat orare në “zonat e gjelbra”, lëvizja në Tiranë deri në orën 21:00
Hiqen të gjitha kufizimet në lëvizje në qytetet e shpallura tashmë si “zona të gjelbra”.
Njoftimin e bën kryeministri Edi Rama përmes një postimi në rrjetet sociale. Në zonat e kuqe, zgjatet fasha orare deri në orën 21:00. Nga dita e hënë hiqen edhe autorizimet për lëvizjen e këmbësorëve dhe automjeteve në të gjithë vendin.
Do të vazhdojë të jetë e ndaluar hyrje-dalja e automjeteve në “zonat e kuqe”. Ndërkohë, Fieri i bashkohet qyteteve që janë shpallur tashmë “zonë e gjelbër”.
Akti Normativ sa i takon ndalesës së studiove televizive do të ndryshojë dhe nga nesër nuk do të jetë më në fuqi ndalimi për të ftuar jo më shumë se një person në studio, por vetëm të respektohet distanca 2 m larg njëri-tjetrit.
Kryeministri Rama në FB:
Nga nesër për javën në vazhdim, në bazë të vendimit të Ministrisë së Shëndetësisë:
- FIERI KTHEHET NË ZONË E GJELBËR
- HIQET KREJTËSISHT FASHA ORARE E LËVIZJES NË ZONAT E GJELBËRTA
- FASHA ORARE E LËVIZJES NË ZONAT E KUQE ZGJATET DERI NË ORËN 21.00
- HIQEN NË TË GJITHË VENDIN AUTORIZIMET PËR LËVIZJEN E KËMBËSORËVE APO AUTOMJETEVE
- VAZHDON TË JETË E NDALUAR HYRJE – DALJA E AUTOMJETEVENË ZONAT E KUQE
- QEVERIA DO TË NDRYSHOJË NESËR AKTIN NORMATIV PËR HEQJEN E NDALESËS SË STUDIOVE TV PËR TË FTUAR JO MË SHUMË SE NJË PERSON. DO TË MBETET VETËM KUSHTI QË TË FTUARIT TË VENDOSEN NË DISTANCË 2m NGA NJËRI – TJETRI
Miq, me heqjen e të gjitha autorizimeve të lëvizjes, ekspozimi ndaj infeksionit rritet shumë dhe barra e çdo individi për të ruajtur veten e të tjerët gjithashtu!
Ju lutem bëni më të mirën tuaj si deri tani dhe kujdes në mënyrën më të veçantë më të moshuarit e të sëmurët në familjet tuaja, të cilët duhet të vetëkufizojnë daljet maksimalisht
*Masa 14 ditore për të vetëkarantinuarit nuk ndryshon dhe shkelja e saj ndëshkohet nga ligji dhe Kodi Penal
