Qyteti tjetër i Maqedonisë së Veriut që po regjistron më shumë të shëruar se të infektuar
Përveç Dibrës që po jep rezultate të mira në këto dy javë, tashmë edhe qyteti i Shtipit është ai qyteti i Maqedonisë së Veriut që në statistikat e fundit shënoi më shumë te shëruar se të infektuar, transmeton Portalb.mk.
Në qytetin e Shtipit, sipas Qendrës për shëndet publik, në ditën e fundit pati katër pacientë të shëruar, derisa nuk ka rezultuar asnjë pacient i ri i infektuar me virusin korona.
Deri më tani në Shtip janë gjithsej 7 të shëruar, ndërsa 32 qytetarë gjithsej deri më tani kanë qenë të infektuar.
Përveç këtyre 7 pacientëve të shëruar, pritet të dalin negativ edhe rezultatet e testimit të dytë edhe për 4 pacientët e infektuar.
Ndryshe, në Maqedoninë e Veriut numri i përgjithshëm i të infektuarve në RMV është 1170 persona, raste aktive janë 957, numri i të shëruarve është 164, ndërsa i të vdekurve 49. Gjithsej, deri më tani në vend janë bërë 11556 testime.
Në Dibër deri më tani ka gjithsej 51 të infektuar, prej të cilëve 31 janë të shëruar tashmë.