Lojtari i Juventusit, rezultoi pozitiv ndaj koronavirusit
Qendërmbrojtësi i Juventusit, Daniele Rugani ka rezultuar pozitiv ndaj koronavirusit, njoftoi klubi italian të mërkurën mbrëma, transmeton Anadolu Agency (AA).
“Daniele Rugani ka rezultuar pozitiv ndaj koronavirusit (Covid-19) dhe aktualisht është asimptomatik”, thuhet në deklaratën e klubit.
“Klubi i futbollit Juventus aktualisht është duke zbatuar të gjitha procedurat e izolimit të kërkuara me ligj, përfshirë edhe ata që kanë pasur kontakte me të”, thuhet më tej.
Futbollisti 25-vjeçar është lojtari i parë me koronavirus në Serie A.
Italia është vendi evropian më i goditur nga koronavirusi, me 827 të vdekur.
Përderisa bota përpiqet të parandalojë përhapjen e virusit i cili po shtrihet me shpejtësi, organizatorët e ngjarjeve sportive në të gjithë globin janë detyruar të anulojnë ose ndryshojnë planet e tyre.
Ngjarjet sportive ndërkombëtare u anuluan ose u riplanifikuan kurse disa u luajtën pa spektatorë. Madje, edhe e ardhmja e Olimpiadës verore në Tokio është në dyshim.
Organizata Botërore e Shëndetësisë (OBSH) të mërkurën e shpalli koronavirusin “pandemi globale”.
Numri global i vdekjeve nga virusi i njohur si COVID-19 ka tejkaluar shifrën prej 4.290 me mbi 118 mijë raste të konfirmuara.
Virusi ka origjinën në Kinë por ka prekur më shumë se 110 vende të botës.
Si pjesë e përpjekjeve për të penguar shpërthimin, shumë qeveri mbyllën kufijtë dhe pezulluan udhëtimin tokësor dhe ajror me vendet më të goditura.