Osmani: Qeveria e vetmja që ka legjitimitet ta drejtojë dialogun me Serbinë
Kryetarja e Kuvendit të Kosovës Vjosa Osmani, ka pritur në takim një delegacion të Gjermanisë dhe të Francës, të udhëhequr nga këshilltari i kancelares Merkel, Jan Hecker dhe këshilltari i Presidentit Makron, Emmanuel Bonne.
Osmani theksoi edhe njëherë përkushtimin e Kosovës që të zhvillojë politika të fqinjësisë së mirë.
Jetësimi i marrëveshjeve të nënshkruara si dhe përafrimi drejt marrëveshjes përfundimtare që rezulton me njohje reciproke ndërmjet Kosovës dhe Serbisë, janë interes i qytetarëve të Kosovës, transmeton Klan Kosova.
“Procesi i dialogut duhet të udhëhiqet nga Qeveria e Kosovës, ngase kështu e ka përcaktuar kushtetuta e vendit dhe vendimi i Gjykatës kushtetuese, por ky është edhe vullneti i qytetarëve të Kosovës, të cilët në zgjedhjet e 6 tetorit e kanë përcaktuar qartë se kush duhet t’u prijë proceseve në vend. Për më tepër, ajo shtoi se edhe Serbia duhet të tregojë se është e interesuar në fqinjësi të mirë dhe në normalizim të raporteve me Kosovën, duke ndërprerë kampanjën ilegale të çnjohjeve dhe duke larguar barrierat jotarifore që ka vendosur në raport me vendin tonë “-tha Osmani.
E para e Kuvendit shprehu gatishmërinë që ta vazhdojnë bashkëpunimin me partnerët tanë ndërkombëtarë, por kërkoi edhe përkrahje në drejtim të liberalizimit të vizave për qytetarët e Kosovës.
“Kosova i ka plotësuar të gjitha kriteret për këtë proces ndërsa Qeveria dhe institucionet e zgjedhura pas 6 tetorit po tregojnë përkushtim maksimal në luftën kundër korrupsionit “- theksoi ajo.
Në anën tjetër, përfaqësuesit e Francës dhe të Gjermanisë, Bonne dhe Hecker rikonfirmuan përkushtimin e vendeve të tyre për ta ndihmuar dhe mbështetur Kosovën në një proces të suksesshëm të dialogut dhe në procesin e integrimit në BE.
