Nigeri, janë vrarë 19 pjesëtarë të Boko Haram-it
Gjatë operacioneve të ushtrisë nigeriane në verilindje të vendit janë vrarë 19 pjesëtarë të organizatës terroriste Boko Haram, raporton Anadolu Agency (AA).
Aminu Iliyasu, zëdhënës i ushtrisë nigeriane, deklaroi se operacionet antiterroriste janë kryer në rajonin Damboa në Borno.
Ai konfirmoi se janë vrarë 19 pjesëtarë të organizatës terroriste, ndërsa gjatë arratisjes shumë prej tyre u plagosën. Është konfiskuar sasi e madhe e municionit dhe armatimit.
Iliyasu tha se tre ushtarë kanë humbur jetën ndërsa katër të tjerë janë plagosur.
Boko Haram është një organizatë terroriste e themeluar në Nigeri në fillim të viteve 2000 nga ekstremisti Muhamed Yusuf për të luftuar të gjitha llojet e kulturës perëndimore, veçanërisht sistemin arsimor të Nigerisë.
Yusuf vdiq në burg në rrethana të paqarta në vitin 2009 ndërsa si rezultat i kësaj, Boko Haram intensifikoi aktivitetet terroriste dhe u bë një kërcënim terrorist global. Kjo organizatë aktualisht operon në Nigeri, Kamerun, Benin, Çad dhe Niger.
