Mustafa: Qeverinë deri në fund të javës – ose pajtohemi që s’ka marrëveshje
Lidhja Demokratike e Kosovës i bëri thirrje të martën lëvizjes Vetëvendosje që të vazhdojnë përpjekjet për formimin e qeverisë së re brenda javës duke theksuar se oferta e tyre e fundit është zgjidhja më e mirë, shkruan Zëri i Amerikës, transmeton Portalb.mk.
Kjo parti u mblodh të martën për të diskutuar situatën e krijuar pas mandatimit te kryetarit të lëvizjes Vetëvendosje, Albin Kurti për formimin e qeverisë.
Pas mbledhjes u tha se LDK-ja edhe njëherë shprehë vullnetin për “një marrëveshje politike të balancuar” me lëvizjen Vetëvendosje që do të pasqyronte në tërësi rezultatin e zgjedhjeve të 6 tetorit.
“Kryesia e LDK-së konsideron që marrëveshja e propozuar nga ekipi negociues i LDK-së e mbështetur në orientimin e Këshillit të Përgjithshëm e reflekton në tërësi rezultatin e zgjedhjeve, garanton përfaqësim dhe përgjegjësi të balancuar që janë të domosdoshme për funksionimin e institucioneve dhe për demokracinë në vend”, thuhet në deklaratën e kësaj partie, duke e ftuar lëvizjen Vetëvendosje që si parti e parë të veprojë shpejt dhe me vendosmëri për të arritur marrëveshje me Lidhjen Demokratike të Kosovës.