ASH: Qytetarët presin për drejtësi, punësim, liri të shprehjes dhe siguri
Partia opozitare Aleanca për Shqiptarët (ASH) ka reaguar në lidhje me zbatimin e drejtësisë në proceset shtetërorë në RMV, transmeton Portalb.mk.
“Niveli i ulët i sundimit të ligjit, mosrespektimi i të drejtave personale dhe ekonomike, mungesa e lirisë së shprehjes dhe informimit, mungesa e sigurisë janë vetëm disa nga indikatorët që treguan se Maqedonia e Veriut nga viti i kaluar e deri tani nuk ka shënuar ndonjë ndryshim në arritjen e shtetit të së drejtës”, deklarojnë nga ASH-ja.
ASH-ja thekson se vendi ka nevojë për reforma serioze, sepse qytetarët po presin për drejtësi, ndërsa politika është ajo e cila duhet të sjellë drejtësinë në çdo institucion shtetëror.
“Sipas Insitutit amerikan Kato, Maqedonia e Veriut sërish radhitet e 56-ta me rend, gjë që tregon qartë se vendi ka nevojë për reforma serioze. Të akuzuarit pa faj presin për drejtësi; të diskriminuarit në punësime presin për drejtësi; jetët njerëzore presin siguri; gazetarët presin liri të shprehjes; qytetarët presin barazi ekonomike dhe respektim të të drejtave dhe dikush patjetër duhet t’ua sigurojë këto të drejta”, deklarojnë nga ASH-ja.
Partia opozitare përkujton se RMV-ja në këtë aspekt është pas shumë vendeve të rajonit, si pas Kroacisë, Shqipërisë, Bullgarisë, Malit të Zi e Bosnje dhe Hercegovinës.