Metodologjia e Francës fillimisht do të shqyrtohet nga shtetet e BE-së, pastaj nga RMV-ja
Metodologjia e re e procesit zgjerues e propozuar nga Franca, fillimisht do të shqyrtohet nga shtetet anëtare të Bashkimit Evropian (BE) dhe më pas nga institucionet e Republikës së Maqedonisë së Veriut (RMV), deklaroi sot ambasadori Kristian Timonie (Christian Thimonier), njofton Portalb.mk.
“Në fakt ato janë mendime franceze të dorëzuara deri te të gjitha shtetet-anëtare të BE-së dhe pas udhëzimeve nga Qeveria ime, unë e kam dorëzuar deri te institucionet e RMV-së. Fillimisht i presim reagimet e shteteve-anëtare, por gjithashtu do të jemi të vëmendshëm dhe do t’i dëgjojmë edhe vërejtjet e palës maqedonase”, tha Timonie pas takimit me kryetarin e Gjykatës Kushtetuese, Sali Murat.
Në lidhje me këtë, Timonie paralajmëroi se sot do të takohet me zëvendëskryeministrin për Çështje Evropiane, Bujar Osmani.
Për metodologjinë e re, e dorëzuar në formë të “non pejper”-it, sot pritet të diskutojnë edhe ministrat e punëve të jashtme të Bashkimit Evropian (BE) në Bruksel.
LEXO: Teksti në formë integrale e “non pejperit” francez për ardhmërinë e zgjerimit të BE-së
Paraprakisht, Franca e ka shpalosur “non-pejperin” e metodologjisë reformuese të procesit të zgjerimit. Në të, ajo kërkon “qasje të rinovuar” në procesin e zgjerimit ndaj vendeve të Ballkanit Perëndimor. Edhe nga Komisioni Evropian kërkohet që deri më janar 2020 të publikojë metodologji të re në procesin e aderimit, e cila do të aplikohet gjatë fillimit të negociatave për aderim me vendet kandidate. Ndër pikat kryesore të “non-pejperit” janë:
- Qasja e rinovuar duhet të bazohet në 4 parime: Qasje graduale, kushte të rrepta, përfitime materiale, reverzibilitet i procesit dhe
- Menaxhim politik më i fortë.
LEXO: Qeveria e RMV-së e komentoi “non pejperin” francez
Qeveria e Maqedonisë së Veriut e ka komentuar “non pejperin”, duke thënës “se është shumë me rëndësi që kornizën të cilën e propozon Franca, e konfirmon anëtarësimin në BE si qëllim kryesor dhe final në procesin që për ne është kusht i domosdoshëm që të shqyrtohet”.
Propozimi francez nuk është pritur mirë në Maqedoninë e Veriut, ngaqë ajo prolongoi për në maj të 2020 marrjen e datës për çeljen e negociatave anëtarësuese me BE-në, të cilat priteshin të ndodhnin në muajin tetor. Mosçeljen e negociatave në tetor, kreu i Komisionit Evropian (KE) e kanë cilësuar si “gabim historik”, ndërkaq kreu shtetëror në RMV si shenjë përgjegjësie shpalli zgjedhje të parakohshme parlamentare për më 12 prill të 2020-s.
LEXO: Pendarovski: Metodologjia e Francës besoj se do të jetë gati deri në mars
