Idlib, 40 mijë civilë janë zhvendosur në 2 javë
Rreth 40 mijë civilë janë zhvendosur në 14 ditët e fundit për shkak të sulmeve që regjimi i Bashar al Asadit dhe mbështetësi i tij Rusia kanë ndërmarrë ndaj vendbanimeve brenda zonës së deskalimit Idlib në Siri, transmeton Anadolu Agency (AA).
Koordinimi i Ndërhyrjes Siriane, një prej institucioneve të shoqërisë civile (OJQ) lokale, ka bërë një deklaratë me shkrim lidhur me migrimin e shfaqur si pasojë e sulmeve intensive të kryera kundrejt zonës së deskalimit Idlib.
“Një pjesë e madhe e civilëve që janë larguar nga sulmet e ndërmarra nga ushtarët e regjimit të Asadit, grupet terroriste me mbështetje iraniane dhe Rusia, janë zhvendosur në hapësirat e kampeve në territoret siriane si Atme, Kah, Deyr Hassan dhe Kefer përballë rajonit Reyhanlı të qytetit Hatay të Turqisë, si dhe në ullishtet në Idlib dhe zonat e operacioneve “Mburoja Eufratit” dhe “Dega e Ullirit”, zona këto të cilat Turqia i ka pastruar nga terroristët”, thuhet në deklaratë.
Në 14 ditët e fundit të muajit tetor regjimi i Asadit dhe Rusia intensifikuan sulmet e tyre tokësore dhe ajrore, ku dhe për këtë arsye janë zhvendosur rreth 40 mijë civilë.
Në deklaratë theksohet se për të njëjtën periudhë janë vendosur në objektiv 2 ambulanca dhe 29 qendra jetësore përfshirë shkolla, xhamia, centrale dhe qendra shëndetësore, ku në sulmet e ndërmarra kanë humbur jetën 6 persona duke përfshirë mësues dhe gazetarë.
Situata e fundit në Idlib
Sipas raportit të mbrojtjes civile, njoftohet se 75 civilë nga të cilët 13 prej tyre fëmijë kanë humbur jetën në sulmet e ndërmarra muajin e kaluar ndaj vendbanimeve civile në Idlib nga regjimi i Asadit, grupet e huaja terroriste me mbështetje iraniane dhe Rusia.
Që nga marrëveshja e nënshkruar më 17 shtator 2018 mes Turqisë dhe Rusisë, në sulmet e regjimit dhe Rusisë në rajonin e deskalimit Idlib kanë humbur jetën mbi 1.300 civilë.
Ndërkohë që ka tejkaluar 1 milion numri i personave që kanë migruar brenda një viti nga vendet ku sulmet janë intensive drejt vendeve që janë më të qeta dhe kryesisht në afërsi të kufirit të Turqisë.
