Katër muaj nga aksidenti në Llaskarcë, Prokuroria ende pa aktakuzë
Edhe pas katër muajve nga aksidenti tragjik i autobusit “Durmo Turs” në fshatin Llaskarcë, ku ndërruan jetë 16 persona, Prokuroria Themelore Publike e Republikës së Maqedonisë së Veriut (RMV) ende nuk ka ngritur aktakuzë, edhe pse shkaqet e aksidentit tashmë janë të njohura, transmeton Portalb.mk
“Nuk ka diçka të re. Po punohet ende në rastin”, thanë nga PTHP-ja për Portalb.mk.
Të pyetur se kur pritet të ngritët aktakuzë, nga PTHP-ja thanë: “Nuk do të donim të spekulonim. Në momentin që do të ketë diçka të re, do ta njoftojmë publikun”.
Nga ana tjetër, ka një muaj që të dyshuarit për aksidentin kanë dalë nga paraburgimi. Gjashtë persona janë në arrest shtëpiak, ndërkaq njërit i është parashtruar masë e kujdesit.
“Me vendim të Gjykatës Themelore Shkupi 1, gjashtë të dyshuarve për veprën penale – Vepra të rënda kundër sigurisë së personave dhe pronës në komunikacion, u është parashtruar masë e arrestit shtëpiak. Prej tyre, tre të punësuarve në stacionin për kontrolle teknike një masë e tillë u qe parashtruar menjëherë pas hapjes së procedurës hetimore, kurse tre të dyshuarve të tjerë, fillimisht u qe parashtruar masë e paraburgimit, ndërkaq më pas u është zëvendësuar me masë të arrestit shtëpiak. Për personin që dyshohet për veprën penale – Kryerje të detyrës në mënyrë të pandërgjegjshme, me vendim të gjykatës i është parashtruar masë e kujdesit”, thanë nga PTHP-ja muaj më parë.
Përveç aksidentit, më 13 shkurt 2019-të qytetarët e Republikës së Maqedonisë së Veriut u ndeshën edhe me gjuhë, e cila sipas njohësve të çështjeve sociale dhe juridike, u cilësua si gjuhë e urrejtjes. Rasti është me profesoreshën Biljana Vankovska, ku për të dhe për persona tjerë, Ministria e Punëve të Brendshme (MPB) ka dorëzuar informacion te PTHP-ja për përdorim të gjuhës së urrejtjes.
Dëmshpërblimi në “status quo”
Nga ana tjetër, ndërmarrja e sigurimit “Eurosig” është e obliguar që t’i dëmshpërblejë familjarët e viktimave dhe të lënduarit nga aksidenti në Llaskarcë. “Eurosig” ka qenë e obliguar që të realizojë fazë të evoluimit të kompensimit të dëmit nga aksidenti, megjithëse edhe pas katër muajsh nga aksidenti, ende asgjë publike se a ka përfunduar kjo fazë dhe në çfarë vlere të hollash do të dëmshpërblehen të lënduarit. Sipas informacioneve të Portalb.mk, deri tash janë dëmshpërblyer 5 familje të viktimave, ndërkaq për të lënduarit nuk ka ende vendim.
Ndryshe, hetimi i PTHP-së tregoi se shkak i aksidentit ka qenë mosfunskionimi i frerëve dhe shpejtësia e madhe prej 99 km/h. Gjashtë persona akuzohen për veprën penale “Vepra të rënda kundër sigurisë së personave dhe pronës në komunikacion”, ndërkaq personi i shtatë është i akuzuar për “Kryerje të detyrës në mënyrë të pandërgjegjshme”, pasi që ka dhënë leje se takometri (pajisje për matjen e shpejtësisë së autobusit) ka qenë në rregull, pa i bërë paraprakisht kontrollet.
Aksidenti në Laskarcë erdhi pasi që autobusi i kompanisë “Durmo Turs” i cili ka qenë duke transportuar udhëtarë nga Shkupi për në Gostivar, doli nga rruga që gjendet në fshatin Laskarcë të Shkupit, me çka u rrokullis duke kaluar krejtësisht në një rrugë në pozitë gjeografike më të ulët se rruga ku ka qenë duke qarkulluar paraprakisht. Si pasojë e rrokullisjes, në vendngjarje ndërruan jetë 15 persona ndërkaq u lënduan 38 të tjerë. Një muaj pas, u shënua edhe viktima 16-të.
GJITHÇKA NË LIDHJE ME RASTIN TRAGJIK LEXO: KËTU
