fbpx

Digjitalizimi i administratës: Dokumentet, qytetarët e Maqedonisë do t’i marrin edhe në mënyrë elektronike

Qeveria e Maqedonisë së Veriut i ka miratuar tre ligje për digjitalizimin e administratës publike, nëpërmjet të cilave qytetarët do të munden që dokumentet e tyre, përveç procedurës aktuale, t’i marrin edhe nëpërmjet rrugës elektronike dhe të njëjtat të kenë vlerën e njëjtë sikur dokumentet në letër.
Këtë sot e deklaroi ministri i Shoqërisë Informatike dhe Administratës, Damjan Mançevski, duke elaboruar mënyrat e reja të nxjerrjes së dokumenteve të cilat do të jenë funksionale në afat kohor 3 muaj pasi që ligjet e miratuara në Qeveri, të miratohen edhe në Kuvend, raporton Portalb.mk.

“Maqedonia po digjitalizohet, Qeveria i ka miratuar tre ligjet që mundësojnë që dokumentet në letër të ndërrohen me dokumente elektronike. Në këtë mënyrë gradualisht do të zvogëlohet përdorimi i letrës gjatë marrjes së shërbimeve nga ana e qytetarëve. Baza e këtij procesi është ligji i ri për Regjistër Qendror të Popullatës”, tha Mançevski.

Qeveria është duke instaluar Regjistër Elektronik të Popullsisë, të përbërë me të dhënat e qytetarëve, të cilat i ka marrë nga Ministria e Punëve të Brendshme, Drejtoria për Menaxhim me Regjistrat Amë dhe Regjistri Qendror.

Portali për shërbime elektronike, Regjistri Elektronik i Popullsisë
Portali për shërbime elektronike, Regjistri Elektronik i Popullsisë

“Me këtë ligj sigurohet dhënie efikase të shërbimeve nëpërmjet rrugës elektronike në bazë të standardeve të caktuara. Ligji e vë në funksion katalogun e shërbimeve, por edhe portalin e ri nacional për shërbime elektronike, që do të ketë shumë funksione. Katalogu në vete i përmban të gjitha informatat e nevojshme për të gjitha shërbimet që i ofron sektori publik. Nëpërmjet portalit, qytetarët do të munden të marrin më shumë shërbime nëpërmjet rrugës elektronike. Ashtu siç numri i shërbimeve do të digjitalizohet, ashtu edhe do të avancohet portali”, shtoi Mançevski, duke siguruar garanci që dokumentet elektronike do ta kenë fuqinë e njëjtë juridike sikur edhe dokumentet në letër”, shtoi Mançevski.

Qeveria nëpërmjet Ministrisë për Shoqëri Informatike dhe Administratë për këtë qëllim ka siguruar vula elektronike për të gjitha institucionet.

Si do të munden qytetarët ta aktivizojnë identifikimin e tyre elektronik?

Gjithçka që do të duhet të bëjnë është që vetëm njëherë të regjistrohen në sistem, atë do të munden ta bëjnë në dy mënyra: E para është që fizikisht ta vizitojnë ndonjë prej sporteleve të autorizuara, të cilat do të ekzistojnë në territorin e gjithë shtetit; e dyta është nëpërmjet rrugës elektronike, atë qytetarët do të munden vetë, pa pasur nevojë që fizikisht të shkojnë në ndonjë institucion.

Në atë moment, çdo qytetar do të mundet t’i marrë në mënyrë elektronike të gjitha dokumentet, të cilat do të jenë ligjërisht të vlefshme. Dokumentet do t’i dërgohen në e-mail.

“Kjo bëhet me qëllim të tejkalimit të procedurave burokratike, shëtitje nëpër sportele dhe pritje në radhë të gjata për marrjen e shërbimeve. Deri te shërbimet do të na ndajnë vetëm disa klikime. Qytetarët të cilët nuk do të munden, që shërbimet t’i marrin në mënyrë elektronike, të njëjtën do të munden ta bëjnë nëpërmjet rrugës së vjetër, gjegjësisht procedurës sikur që ka qenë deri më tani. Ligjet garantojnë besueshmëri të plotë dhe mbrojtje të të dhënave personale, konfirmim për atë është edhe mbështetja nga Bashkimi Evropian dhe vlerësimi pozitiv për tre ligjet. Digjitalizimi i shërbimeve e bën procesin më të thjeshtë, më të shpejtë, më të sigurt, më të lirë dhe të qasshëm për të gjithë qytetarët”, tha Mançevski.

Në lidhje me çmimet e shërbimeve, ministri tha se kjo bëhet me qëllim që të jenë më të lira, pasi që edhe kostoja për prodhimin e dokumenteve do të ulet, por tha se institucionet vetë duhet që t’i revidojnë çmimoret e tyre.

Tags

Lajme të ngjashme

Leave a Reply

Your email address will not be published. Required fields are marked *

Back to top button
Close