Regjistrimi i popullsisë, LSDM kundër grafit etnik, BDI e papërcaktuar
Të gjitha partitë politike në Maqedoni, përpos LSDM-së janë kundër regjistrimit të popullsisë pa grafin etnik. Partitë shqiptare qëndrojnë fort pas fjalëve se regjistrimi pa përcaktim etnik nuk do të ishte i plotë duke u bazuar në faktet se të drejtat e shqiptarëve në vend janë të varura nga numrat.
Ministrja e Mbrojtjes, Radmilla Shekerinska, thotë se në regjistrim nuk duhet të bëhet ndarje etnike por duhet të mësohet numri i vërtetë i popullsisë që për momentin jeton në Maqedoni, sepse sipas ministres, Maqedonia po zbraze, transmeton Tv21.
Për opozitaren VMRO-DPMNE përcaktimi etnik është shumë i rëndësishëm duke u bazuar edhe në Marrëveshjen kornizë të Ohrit.
Lideri i Aleancës për Shqiptarët, Ziadin Sela thotë se ata si parti politike do të kundërshtojnë regjistrimin e popullsisë në rast se në të nuk ka grafë etnike dhe fetare. Sipas tij, shprehja e lirë e përkatësisë kombëtare dhe fetare është konform të drejtave universale të njeriut .
Edhe nga Lëvizja Besa pohojnë se shtetit dhe institucioneve shtetërore u nevojiten të dhëna të sakta statistikore rreth përbërjes etnike. Besa e Gashit është e të njëjtit mendim.
Edhe përkundër tentimeve, kësaj radhe nuk ka përgjigje nga BDI. Përpara rreth një muaji, lideri i BDI-së, Ali Ahmeti, gjatë një interviste për Radio Evropa e Lirë, deklaroi se për partinë e tij nuk ka ndonjë problem edhe nëse përfshihet apo nuk përfshihet përkatësia etnike në regjistrimin e popullatës në vitin 2020. Sipas tij, me rëndësi është që të bëhet një ligj i pranueshëm për të gjitha palët.
LEXO: Novkovska: Regjistrimi pa përkatësi etnike nuk është regjistrim (VIDEO)
