Ministri hungarez: Hungaria mbështet anëtarësimin e Maqedonisë dhe BeH-së në NATO
Ministri i Jashtëm dhe Tregtisë i Hungarisë, Peter Szijarto, ka thënë se vendi i tij mbështet anëtarësimin e Maqedonisë dhe Bosnjë e Hercegovinës (BeH) në NATO, raporton Anadolu Agency (AA).
Szijjarto tha se Maqedonia ka bërë hapa serioze për t’u bërë anëtare e NATO-s, duke shtuar se pret që vendi të bëhet anëtare e Aleancës pasi të ketë zgjidhur problemin me emrin me Greqinë.
Më tej shtoi se Hungaria edhe më tej do të vazhdojë të mbështesë rrugën euro-atlantike të Maqedonisë.
“Maqedonia që më herët duhej të ishte anëtare e NATO-s. Përpjekjet të cilat i ka bërë deri më tani janë të mjaftueshme”, ka thënë kryediplomati hungarez.
Szijjarto theksoi se problemet e pazgjidhura në Ballkanin Perëndimor shkaktojnë vështirësi shtesë, duke shtuar se përshpejtimi i integrimit euro-atlantik do të kontribuonte në mënyrë të rëndësishme për zgjidhjen e problemeve ekzistuese.
Ai tha se BeH në aspektin gjeografik është afër Maqedonisë, për çka, siç theksoi, është e rëndësishme që edhe aty të vendoset stabiliteti.
Maqedonia në korrik të këtij viti mori ftesën për anëtarësim në NATO, ndërsa ministrat e Jashtëm të vendeve anëtare të NATO-se në takimin e djeshëm miratuan programin e parë nacional të BeH-së, me çka ky vend mori ofertën e parë për planin aksionar të anëtarësimit në NATO.
