Thaçi: Trump mbështet 100% marrëveshjen me Serbinë
Presidenti i Kosovës, Hashim Thaçi, tha se ka takuar të shtunën mbrëma në Paris presidentin e Shteteve të Bashkuara, Donald Trump.
Përmes një postimi në Twitter, Thaçi tha se Trump shprehu “100% mbështetje për marrëveshjen ligjërisht të detyrueshme midis Kosovës dhe Serbisë”.
“Jam mirënjohës për mbështetjen e tij dhe të SHBA-së”, shkroi Thaçi.
I had a great encounter last night with ??President @realDonaldTrump. He expressed “100% support for the legally binding agreement between #Kosovo and Serbia”. I’m grateful for his and #US?? support. pic.twitter.com/LZIwAni7GI
— Hashim Thaçi (@HashimThaciRKS) November 11, 2018
Pak orë pas këtij postimi, Thaçi shkroi sërish në Twitter lidhur me takimin që ka pasur me presidentin Trump dhe tha se me të janë pajtuar për “nevojën për të zgjeruar paqen dhe pajtimin në Ballkanin Perëndimor, duke arritur një marrëveshje përfundimtare dhe gjithëpërfshirëse ndërmjet Kosovës dhe Serbisë” dhe duke mundësuar që Republika e Kosovës “t’i bashkohet NATO-s, OKB-së dhe BE-së”.
Thaçi dhe dhjetëra liderë botërorë, përfshirë presidentin amerikan, qëndruan në Paris ku morën pjesë në shënimin e 100-vjetorit të përfundimit të Luftës së Parë Botërore.
In this day of #Armistice100, commemorating the end #WorldWarI, we agreed w/ President @realDonaldTrump on need to extend peace & reconciliation in #WesternBalkans by achieving final & comprehensive agreement between #Kosovo & #Serbia, enabling our Republic join @NATO, UN, EU. pic.twitter.com/mTbGQIMAkP
— Hashim Thaçi (@HashimThaciRKS) November 11, 2018
Thaçi po udhëheq delegacionin e Kosovës në bisedimet me Serbinë për normalizimin e marrëdhënieve.
Arritja e një marrëveshjeje ligjërisht të obligueshme është synim i të dyja palëve, ashtu si dhe kusht për përparimin e tyre në rrugën e integrimit evropian.
Thaçi dhe homologu i tij serb, Aleksandar Vuçiq, kanë shpalosur së voni idenë për ndryshimin e kufijve, si mundësi për zgjidhjen e problemeve.
Ideja ka hasur në reagime për dhe kundër në Kosovë dhe Serbi, ashtu si edhe te komuniteti ndërkombëtar.
