Edhe Belgjika dëbon një diplomat rus
Kryeministri i Belgjikës, Charles Michel, deklaroi mbrëmë se qeveria e vendit të tij, ka marrë vendim për të dëbuar një diplomat rus, i cili brenda 14 ditëve duhet të braktisë vendin, raporton Anadolu Agency (AA).
Siç tha Michel, vendimi i marrë është i lidhur me helmimin e ish spiunit rus Sergej Skripal dhe të bijës së tij Julija në Britani të Madhe.
“Veprimi i Belgjikës ka qenë në bashkëveprim me partnerët në Bashkimin Evropian (BE) dhe në NATO. Ne vendosëm të dëbojmë një diplomat i cili vepron në kuadër të misionit diplomatik rus në vendin tonë”, tha Michel përmes një kumtese.
Ai tha se vendimi i Belgjikës është i drejtë, marrë parasysh tërë situatën aktuale.
Theksohet se diplomati i lartpërmedur brenda 14 ditëve duhet të braktisë Belgjikën.
Vendimi fillestar për dëbimin e diplomatëve rusë është marrë nga Britania e Madhe dhe SHBA-të, të cilin më vonë e ndoqën edhe shumë shtete të BE-së, të cilat thonë se Rusia është përgjegjëse për helmimin e Skripal-it.
Së fundmi edhe Irlanda u rreshtua me shtetet të cilat kanë dëbuar diplomatë rusë, pasi paraprakisht ministria e saj e Jashtme njoftoi për dëbimin e një diplomati.
