Arifi: Ajri në Tetovë është pastruar pasi u zgjodh edhe çështja e ujit
Mbyllja e “Jugohromit”, pastrimi i deponisë dhe zgjidhja e çështjes së ujit, sipas kryetares së Komunës së Tetovës, Teuta Arifi, janë indikatorët që kanë ndikuar në zvogëlimin e ndotjes së ajrit, ndërkaq vazhdon të ngelet “hall i madh” komunikacioni në Tetovë, njofton Portalb.mk.
“Ne kemi pasur një dimër i cili për komunën e Tetovës në krahasim me komunat që kanë qenë në vendet e para të ndotjes, ne kemi pasur një dimër shumë të lehtë dhe ajo i dedikohet më shumë arsyeve, faktit që fabrika “Jugohrom” nuk punon pa filtra, është hequr deponia në hyrje të qytetit, faktit që është zgjidhur çështja me ujin, kurse komunikacioni mbetet hall i madh i komunës dhe i qytetarëve. Komuna e Tetovës i shërben me shërbime të ndryshme shumë komuna përreth, qoftë sa i përket shkollave, komunave apo tregtisë dhe ajo normalisht krijon ngritje më të madhe të koncentrimit të lëvizjes. Plani ynë është zgjerimi i zonës së parkingjeve që e ulë frekuencën në pjesën qendrore të qytetit, kemi pasur tanimë takime pune dhe vazhdojnë takimet operative me policinë për të arritur njëkahëzimin si një prej zgjidhjeve dhe pakëz më tepër të ngritën kontrollin e komunikacionit”, tha Arifi gjatë promovimit të pastruesve të ajrit në çerdhen “Mlladost”.
Sipas matësit online “Mojvozduh” (Ajri im), ajri në Komunën e Tetovës është dyfish i ndotur, gjegjësisht grimcat PM 10 momentalisht kanë arritur në 119 mikrogramë nga 50-të të lejuarat, ndërkaq grimcat PM 2.5 kanë arritur në 94.
