Puxhdemon: Do të marr pjesë në zgjedhjet e parakohshme raonale

Ish-presidenti i Qeverisë katalanase, Karles Puxhdemon, i cili udhëtoi për në Bruksel pasi që autoriteteve rajonale të Katalonjës u janë marrë të gjitha kompetencat, sot theksoi se është i gatshëm të që të kandidojë  në zgjedhjet e parakohshme rajonale, të cilat Qeveria spanjolle i shpalli për më 21 dhjetor.

“Jam i gatshëm të jem kandidat. Është e mundur që të zhvillohet fushatë nga gjithkund. Ne e quajmë veten Qeveri legjitime. Duhet të ketë kontinuitet me qëllim që t’i tregohet botës se çka po ndodh në Spanjë. Nuk mundem me Qeverinë që është  në burg të kem zgjedhje, të cilat do të jenë neutrale, të pavarura dhe normale”, deklaroi Puxhdemon për televizionin shtetëror belg, RTBF.

Paraprakisht sot, Bashkimi Evropian refuzoi të intervenojë me rastin e fletarrestit evropian për heqjen nga liria të Puxhdemonit, të cilin pritet ta lëshojë Spanja.

“Kjo është në tërësi çështje e organeve legjislative, kompetencën e së cilës e mbështesim tërësisht”, deklaroi zëdhënësja e Komisionit Evropian, Anika Brajnhart.

Gjykata spanjolle dha urdhërarrest evropian për ish-liderin katalanas, Karles Puxhdemon, kumtoi avokati i tij, Poll Beker.

“Sapo mora lajmin për klientin tim se (urdhri për arrestim) me të vërtetë është lëshuar dhe katër ministra në Belgjikë. Kjo praktikisht do të thotë se gjyqësia spanjolle tani do t’i dërgojë kërkesë për ekstradim Prokurorisë federale në Bruksel”, tha Beker për televizionin VRT.

Një burim anonim nga gjykata deklaroi për mediumet se sot do të lëshohet urdhër për arrestimin e Puxhdemonit dhe katër ministrave të cilët për momentin ndodhen në Belgjikë. Ata nuk u paraqitën para gjykatës dje në mëngjes në dëgjimin para Gjykatës supreme, pas çka prokuroria dje kërkoi të lëshohet fletarrestim ndërkombëtar për Puxhdemonin.

Gjithsej 20 politikanë katalanas – Puxhdemon, 13 ministra në qeverinë e tij të shkarkuar dhe gjashtë anëtarë të Parlamentit rajonal, dhe u thirrën të paraqiten para gjykatës nën akuzën për kryengritje dhe aktivitete antishtetërore.

Nga të gjithë ata, vetëm Puxhdemon dhe katër ministra, të cilët ndodhen në Belgjikë, nuk u paraqitën para Gjykatës në Madrid.

Gjykata supreme u caktoi paraburgim tetë anëtarëve të Qeverisë së shkarkuar, përderisa ish-ministri Santi Vila, i cili dha dorëheqje para shpalljes së njëanshme të pavarësisë së Katalonjës, është liruar me kaucion prej 50.000 eurove.

Kryetari i shkarkuar i Qeverisë rajonale katalanase, Karles Puxhdemon mbrëmë vonë kërkoi që autoritetet spanjolle t’i lirojnë nga paraburgimi tetë anëtarët e Kabinetit të tij.

“Si kryetar legjitim i Qeverisë së Katalonjës, kërkoj lirimin e ministrave dhe të nënkryetarit Oriol Zhunkares”, deklaroi Puxhdemon për televizionin rajonal katalanas.

Kërkesa e këtillë e Puxhdemonit pasoi vetëm disa orë pasi që Gjykata supreme e Spanjës u caktoi masë paraburgimi tetë anëtarëve të Qeverisë së shkarkuar katalanase, kundër të cilëve është ngritur aktakuzë për kryengritje dhe aktivitete antishtetërore.

Në deklaratën e dhënë në Belgjikë, Puxhdemonin u bëri thirrje katalanasve të protestojnë kundër autoriteteve spanjolle “pa dhunë, qetë dhe me respektim të të gjitha mendimeve”.

“Mllefi me të cilin Qeveria spanjolle sulmoi një komb të mrekullueshëm evropian, është i turpshëm dhe paraqet kërcënim për të gjithë ne”, deklaroi Puxhdemon, duke shtuar se pavarësia e Katalonjës “tashmë nuk është problem i brendshëm” i Spanjës.