Basha: Jemi vendi i vetëm në rajon ku librat për shkollimin e detyrueshëm s’jepen falas
Përmes një deklarate për mediat, kreu i Partisë Demokratike Lulzim Basha shprehet se mijëra prindër dhe nxënës vazhdojnë radhët e gjata për tekstet shkollore, ndërsa Shqipëria është vendi i vetëm në rajon ku librat për shkollimin e detyrueshëm nuk jepen falas.
Sipas Bashës, rritja e çmimit të librave ka rritur barrën e prindërve qe kërkojnë të shkollojnë fëmijët e tyre.
Deklarata:
Mijëra prindër dhe nxënës vazhdojnë radhët e gjata për tekstet shkollore anembanë vendit. Jemi vendi i vetëm në rajon ku librat për shkollimin e detyrueshëm jo vetëm nuk jepen falas, por janë shtrenjtuar çdo vit.
Dy shembuj: paketa e librave të detyrueshëm për klasën e parë është shtrenjtuar me 33% këto 4 vjet, nga 11 mijë e 790 lekë në vitin shkollor 2012-2013 në 17 mijë e 760 lekë në vitin shkollor 2015-2016.
Për të njëjtën periudhë, paketa e librave të detyrueshëm për klasën e gjashtë është rritur me 23 për qind, nga 38 mijë e 70 lekë në 48 mijë e 920 lekë.
Kjo rritje çmimesh ka rritur barrën ndaj prindërve e cila rëndon edhe më shumë sepse të ardhurat reale mesatare të familjeve shqiptare kanë rënë prej inflacionit dhe ngrirjes së pagave.
Shpërfillja e arsimit është dëm i pariparueshëm për të ardhmen e vendit. Librat për arsimin e detyrueshëm duhet të jepen falas dhe të shpërndahen nga vetë shkollat. Për këtë, mjafton që qeveria të investojë për libra dhe mjete shkollore paratë që çon për fasada ministrish dhe luks qeveritarësh.
