Rasti “Kumanova”, Grubi paralajmëron nisjen e një iniciative për përgjegjësinë e Agjencisë për Zbulim
“Gjykimi i deritanishëm në rastin e Kumanovës nëpërmjet prezantimit të dëshmive nga ana e protagonistëve të ngjarjes po zbulon të vërtetën shokuese për përfshirje mashtruese në këtë rast të agjentëve të Agjencisë për Zbulim, që është nën kompetencat e Presidentit Ivanov”, shkruan deputeti i BDI-së, Artan Grubi, në një status në “Facebook”, transmeton Portalb.mk.
Ai ka njoftuar se në cilësinë e deputetit, do të nis një iniciativë në Kuvend për përgjegjësinë e drejtuesve të Agjencisë për Zbulim, siç thotë ai, për këtë rast kaq të rëndë.
“Njëkohësisht, dëshmitë e protagonistëve e konfirmojnë në tërësi që BDI dhe kryetari Ahmeti nuk kanë asnjë gisht të vetëm në këtë ngjarje tragjike. Prandaj miq, e vërteta po del në shesh përkundër gjithë fushatës së tmerrshme dhe të papërgjegjshme mediatike dhe opozitare”, shton Grubi.