Ithtarët e SHI-së kanë likuiduar të paktën 30 civilë në Afganistan

Talebanët afganë të lidhur me grupin Shteti Islamik (SHI) mbrëmë kanë vrarë të paktën 30 civilë, duke përfshirë edhe fëmijë, të cilët paraprakisht i kanë rrëmbyer në provincën qendrore Gor, kumtoi sot guvernatori provincial Hariz Haze.

Ai theksoi se vrasjet janë kryer si hakmarrje për vdekjen e një komandanti lokal të SHI-së.

“Forcat afgane të sigurisë, me ndihmën e popullatës lokale dje zbatuan operacion gjatë të cilit u vra një komandant i SHI-së i quajtur Faruk. Si hakmarrje të vrasjes, xhihadistët, rrëmbyen tridhjetë fshatarë, nga të cilët shumica bujq. Trupat e tyre të shpuar nga plumbat janë gjetur sot në mëngjes nga banorët lokalë”, deklaroi Haze.

Një përfaqësues i autoriteteve në provincë deklaroi se autorët e krimit janë anëtarë të grupit të shkëputur taleban, i cili vitin e kaluar u betua në besnikëri në degën e SHI-së në Afganistan.

Forcat qeveritare ndërkohë kanë likuiduar të paktën 45 luftëtarë, duke përfshirë 19 terroristë nga SHI-ja në provincën lindore Nangarhar.