AAK: Demarkacioni duhet të rrezohet sot
Aleanca për Ardhmërinë e Kosovës përmes një komunikate për media, ka theksuar se Demarkacioni sot duhet të rrëzohet.
“AAK beson se marrëveshja e Demarkacionit me Malin e zi, merr epilog me votimin në Kuvend, prandaj edhe beteja për rrëzimin e kësaj marrëveshjeje, sot, duhet të zhvillohet aty.
Kundërshtimi politik e qytetar, për tash e një vit, duke përfshirë protestat, peticionin e mbi 200 mijë qytetarëve, gazin në Kuvend dhe plot aktivitete opozitare e qytetare, e kanë dhënë efektin e vet dhe sot një numër i mjaftueshëm i deputetëve e kanë kuptuar se marrëveshja është gabim, dhe prandaj vota e tyre do të jetë kundër”, thuhet në komunikatë.
Më tej në këtë komunikatë theksohet se në këto moment vendimtare, përpara votimit të një çështjeje jetike për Kosovën, të gjithë duhet të jemi të matur e të përgjegjshëm, dhe të mos biem pre e presioneve apo provokimeve, por të mos e ndryshojmë votën kundër.
“Demarkacioni duhet të rrëzohet me votën e të gjithë deputetëve, pa dallim partie politike, rajoni, apo etnie. Vota kundër është votë për Kosovën si një dhe e pandashme.
Liderët e shumicës, duhet ta kuptojnë, se shumica e deputetëve dhe e popullit të Kosovës, nuk e mbështesin marrëveshjen e tyre! Kjo është demokracia, prandaj çdo përpjekje e tyre për të prodhuar rezultat tjetër të këtij votimi, është përpjekje për ta futur vendin në qorrsokak, dhe gjithë përgjegjësia do të jetë e tyre”, thuhet në fund të komunikatës
