Gratë në menopauzë: Ushqimet që ulin rrezikun për sëmundje

E. Z. 18:10, 12-02-2016

Specialistët: Duhet të ketë një rritje të konsumit të drithërave dhe derivateve të tyre, peshkut, mishit të dobët, frutave dhe perimeve të freskëta, qumështit të skremuar, vajit të ullirit si garniturë, shoqëruar kjo me uljen e konsumit të yndyrave të ngopura, si: djathërat dhe nënproduktet e qumështit

Menopauza është një periudhë e pashmangshme gjatë jetës së një gruaje. Përtej ndryshimeve fizike, mjekët shprehen se cikli menstrual është një e “keqe” e domosdoshme, duke u bërë mburojë për shëndetin, sakaq pas menopauzës, sfida të reja presin shëndetin e gruas. Gjatë kësaj periudhe, gratë përveçse shtojnë në peshë, kryesisht dhjam rreth zonës së barkut, shtohet rrezikut për kancerin e gjirit, diabetin dhe sëmundjet kardiovaskulare.

Menopauza

Menopauzë nënkupton ndërprerjen e ciklit menstrual te gratë, rreth moshës 50 vjeç dhe fundin e periudhës fertile. Kjo periudhë shoqërohet me ndryshime të mëdha hormonale dhe metabolike, të cilat shkaktojnë nga çrregullimet bezdisëse subjektive, deri në shfaqje të patologjive të ndryshme që përkeqësojnë ndjeshëm cilësinë e jetës së gruas. Kjo periudhë shoqërohet në përgjithësi me shtim në peshë dhe një rishpërndarje të dhjamit, nga i tipit periferik në tipin abdominal (rreth zonës së barkut), i shoqëruar me një rritje të rrezikut për kancerin e gjirit, diabetin, sëmundjet kardiovaskulare. Një ushqyerje korrekte dhe fiziologjikisht e ekuilibruar, ndikon ndjeshëm në minimizimin e çrregullimeve gjatë kësaj faze të jetës.

Specialistët

Duhet të kihet parasysh që nevojat për energji dhe disa nutrientë, si pasojë e modifikimeve hormonale të kësaj periudhe, ndryshojnë shumë, ku është e nevojshme të ulet konsumi i disa ushqimeve, sidomos atyre të pasura me yndyra dhe kalori. Ndërkohë duhet të pasurohen vaktet normale të ushqimit, me suplemente të nevojshme, si: kalciumi dhe vitamina D.

Korrigjimi i zakoneve ushqyese mund të sjellë efekte pozitive lidhur me disa patologji karakteristike të kësaj periudhe, si: osteoporoza, sëmundjet koronare, kanceret (në veçanti kanceri i gjirit dhe i zorrës së trashë). Kjo periudhë mund të shoqërohet me vendosjen e një raporti konfliktual pëlqim-urrejtje, të ushqimit te gruaja, ndonjëherë duke çuar deri në krizë bulimie apo çrregullime të mënyrës së ushqyerjes.

Në përgjithësi ushqyerja e gruas së shëndetshme në menopauzë, duhet të jetë e ngjashme me atë të një të rrituri të shëndetshëm, me pak ndryshime lidhur me moshën dhe disa raporte hormonale. Duhet të ketë një rritje të konsumit të drithërave dhe derivateve të tyre, peshkut, mishit të dobët, frutave dhe perimeve të freskëta, qumështit të skremuar, vajit të ullirit si garniturë, shoqëruar kjo me uljen e konsumit të yndyrave të ngopura, si: djathërat dhe nënproduktet e qumështit.

Në menopauzë nuk ka arsye apo një kundër indikacion të prerë, lidhur me ndalimin e konsumit të verës. Ajo është e lejueshme me të vetmin rekomandim që të konsumohet gjatë vakteve dhe në masën e specifikuar për këtë moshë.

Nutricionistët dhe mjekët, e dinë se të ngrënit ndikon në gjendjen shpirtërore të gruas. Këtë e vërtetojnë dhe shumë evidenca, të cilat tregojnë se ushqime të tilla si frutat përmbajnë antioksidantë, të cilët ndikojnë në uljen e simptomave të menopauzës.

Dieta

Dieta në menopauzë përfshin ushqime të shumëllojshme, ushqime me yndyra të ulëta, ushqime me sasi të larta fibrash, të cilat ndihmojnë në uljen në peshë dhe përmirësojnë tretjen. Dietat e bazuara në ushqimet e përmendura, janë të pajisura me kalcium, që është i nevojshëm për kockat. Ushtrimet e frymëmarrjes ndihmojnë në minimizimin e afsheve të nxehta, ankthit dhe gjendjes shpirtërore. Gjithashtu joga është shumë relaksuese. Ushtrimi i saj bën të ndihesh e çliruar nga stresi dhe depresioni, të cilat mund të përkeqësojnë më shumë simptomat e menopauzës dhe të drejtojnë në shtimin në peshë.

Është e thjeshtë të ushqehesh në menopauzë.

Mjaftojnë vetëm tri vakte të rregullta dhe një ose dy vakte ndërmjetëse. Është e rëndësishme t’iu qëndrosh larg pijeve alkoolike, kafes dhe ushqimeve pikante, pasi këto ndikojnë në ashpërsimin e afsheve të nxehta. Gjithashtu është e nevojshme të provohen pak ushqime të tilla si qumësht soje, arra, lajthi, stika, por jo të konsumohen rregullisht. Të pihet sasi e bollshme uji, 6-8 gota në ditë.

Të zgjidhet një nga këto, si vakt i ndërmjetëm – nga të cilat mund të konsumohen dy në ditë:

Një grusht rrush i kuq dhe një grusht boronicë.

Një grusht boronicë e thatë, kajsi e thatë dhe fiq të thatë.

Një grusht bajame, një grusht kikirikë ose arra.

Një mollë, banane ose portokall.

Një kuti e vogël me kos frutash pa yndyrë, nëse është kos soje është më i mirë.

Një kupë sallatë frutash e bërë në shtëpi.

Për mëngjes, zgjidh një nga këto:

Një kupë me qull, bërë me qumësht soje ose qumësht të skremuar, ëmbëlsuar me një lugë mjaltë ose pak kripë.

Një fetë të madhe me pjepër, bajame të zhveshura.

Dy rriska tost, me miell të errët me margarinë dhe marmelatë ose djathë të butë me pak yndyrë.

Peshk të pjekur sipas shijes (salmon, sardele, barbun, koc, levrek), me domate të pjekura dhe kërpudha.