Edhe në tenis kishte trukime
Sipas BBC-së dhe rrjetit “BuzzFeed”, nga hetimet e Njësisë së Integritetit të Tenisit (TIU) rezulton se në dhjetë vitet e fundit, 16 tenistë të renditur në 50 vendet e para dyshohet se kanë trukuar ndeshje. Mes këtyre sportistëve nën hetim ka edhe fitues të turneve Grand Slem.
Në dokumentacionin që është në zotërim të BBC-së dhe “BuzzFeed”-it përfshihet edhe rezultati i hetimeve të ndeshjeve mes Nikolai Davidenkos dhe Martin Argehos në vitin 2007. Të dy tenistët në fund u liruan nga akuzat, por hetimet vijuan në kërkim të lidhjeve të mundshme mes sportistëve dhe organizatorëve të basteve klandestine në internet. Mësohet se ky rrjet e ka bazën në Rusi, Italinë e Veriut dhe Siçili, ndërkohë që shumat e vendosura për ndeshjet që dyshohen të trukuara janë mijëra euro.
Në të njëjtën kohë, në dokument ekziston edhe një listë e tenistëve ende në aktivitet që janë të përfshirë në këtë skandal, por BBC-ja preferon të mos i publikojë emrat e tyre. Nga hetimet rezulton se tri nga ndeshjet e trukuara janë të turneut “Uimbëlldon”, ndërkohë që tetë prej tenistëve të dyshuar janë pjesëmarrës edhe në edicionin e këtij viti të “Australian Open”.
Ndërkaq, Shoqata e Profesionistëve të Tenisit (ATP), nëpërmjet presidentit Kris Kermod i hodhi menjëherë poshtë akuzat në mënyrë kategorike, duke theksuar se institucioni që ai drejton do të hetojë për çdo informacion që vjen në lidhje me dyshime të tilla.
