Sofje, Komisioni Evropian nis Agjendën Digjitale për Ballkanin Perëndimor
Komisioni Evropian sot në Sofje prezantoi “agjendën digjitale” për Ballkanin Perëndimor, raporton Anadolu Agency (AA).
Në Asamblenë e sotme Digjitale 2018, e cila mbahet në Sofje të Bullgarisë, Komisioni Evropian dhe gjashtë partnerët e saj, nga Ballkani Perëndimor, Shqipëria, Bosnja e Hercegovina, Kosova, Mali i Zi, Maqedonia dhe Serbia, së bashku lançuan Agjendën Digjitale për Ballkanin Perëndimor.
Programi synon të mbështesë tranzicionin e rajonit drejtë ekonomisë digjitale, ndërsa avantazhet dhe përfitimet e transformimit digjital për qytetarët do të jenë rritja më e shpejtë ekonomike, më shumë vende pune dhe shërbime më të mira.
“Qëllimi i kësaj ngjarjeje është që qytetarët e Ballkanit Perëndimor të përfitojnë plotësisht nga transformimet e shpejta dhe të pashmangshme digjitale”, tha Marija Gabriel, komisionere për Ekonomi dhe Shoqëri Digjitale.
Agjenda Digjitale i dedikohet vendeve pjesëmarrëse që të investojnë në lidhjen ndër vete, të rrisin sigurinë kibernetike, të avancojnë ekonominë digjitale dhe të përkrahin inovacionet.
Agjenda Digjitale bazohet në samitin joformal BE-Ballkani Perëndimor që u mbajt më 17 maj në Sofje.
