Bashkëshortja e Ivanoviçit: Dihet kush e ka bërë këtë…

Bashkëshortja e Oliver Ivanoviçit, Milena Popoviq Ivanoviç, pas marrjes së lajmit për vrasjen e bashkëshortit të saj, sipas “Blicit”, tha se “Dihet kush e ka bërë këtë, por ata që e kanë bërë këtë duhet ta dinë se kjo nuk do të kryhet aq lehtë”.

Gazeta “Blic” e Beogradit raporton hollësi të reja rreth vrasjes së sotshme të Oliver Ivanoviçit, liderit të Iniciativës Qytetare.

Mbi Oliver Ivanoviçin atentatorët shtinë nga rruga, e pastaj ikën me veturën e tipit “Opel Astra”, të cilën e kanë djegur, shkruan kjo gazetë, transmeton Koha.net.

Në momentin e vrasjes, Ivanoviç ndodhej në shkallë, në hyrje të ambienteve të partisë së tij. Mbi të u shti pas shpine, nga “Nëntëshja” e gjatë.

Sipas kësaj gazete u shti nga revolja me shurdhues (silanciator). Është shtënë disa herë. Gazeta thotë se ndaj Ivanoviçit nga largësia është shtënë pesë herë, e pastaj atentatori i është afruar dhe mbi të ka zbrazur edhe një plumb nga afërsia.

Ivanoviçin e plagosur rëndë e ka gjetur fqinja që po shkonte në dyqan dhe ajo menjëherë ka thirrur urgjencën, ndërsa në ndihmë i kanë dalë edhe bashkë partiakët që ndodheshin në ambientet e partisë .

Avokati i tij Nebojsha Vllajiq tha se Ivanoviç “duket se vdiq në vendin e ngjarjes. Sa dimë deri më tash, ai kishte pesë plagë”, transmeton Koha.net raportimin e “Blicit” të Beogradit.

Bashkëshortja e Ivanoviçit, Milena Popoviq Ivanoviç, pas marrjes së lajmit për vrasjen e bashkëshortit, sipas “Blicit”, tha se “Dihet kush e ka bërë këtë, por ata që e kanë bërë këtë duhet ta dinë se kjo nuk do të kryhet aq lehtë”.

Rada Trajkoviq, ish-deputetja e Kuvendit të Kosovës, tha se “Kjo është një ditë e zezë për të gjithë ne serbët e Kosovës. Humbëm njërin nga liderët kryesorë”.