Në Gjenevë vazhdojnë bisedimet për Sirinë

Vazhdojnë në javën e tretë dhe të fundit bisedimet e raundit të 8-të në Gjenevë mbi Sirinë, me takimet mes delegacioneve të opozitës dhe regjimit dhe Kombeve të Bashkuara (OKB), raporton Anadolu Agency (AA).

Në dy javët e para të negociatave indirekte, të cilat filluan më 28 nëntor në Gjenevë të Zvicrës, nuk u arrit ndonjë rezultat konkret për faktin se delegacioni i regjimit të Bashar al Asadit që iu bashkua vonë negociatave u largua më pas nga Gjeneva. Asnjë përparim konkret nuk është arritur në dy javët e para të bisedimeve për shkak të qëndrimit të regjimit.

Me përpjekjet e përfaqësuesit Special të OKB-së për Sirinë, Staffan de Mistura, delegacioni i regjimit nën udhëheqjen e Beshar Xhaferit mbërriti ditën e djeshme në Gjenevë. Bëhet e ditur se Mistura ditën e sotme do të takohet në zyrën e OKB-së në Gjenevë me përfaqësues të Komitetit të Lartë Negociator të formuar nga opozitarët sirianë nën udhëheqjen e Nasir Haririt, ndërsa ai ka kryer një takim me delegacionin e regjimit.

Palët takohen ndarazi me Misturan për shkak se delegacioni i regjimit nën drejtimin e Xhaferit ashtu si edhe në raundet e mëparshme ka refuzuar kërkesën për bisedime të drejtpërdrejta me opozitarët.

Opozitarët sirianë më 22-23 nëntor u takuan në kryeqytetin e Arabisë Saudite, Rijad, dhe formuan një delegacion të ri negociatorësh të Komitetit të Lartë Negociator. Në deklaratën rreth takimit në fjalë ishte bërë e ditur se opozitarët kanë theksuar se procesi i tranzicionit në Siri nuk do të mund të fillonte nëse Bashar al Asadi nuk do të largohej nga detyra e tij.

Në bisedimet për Sirinë të cilat do të përfundojnë më 14 dhjetor, përfshihen katër tema kryesore, të cilat janë tranzicioni i qeverisë, kushtetuta, zgjedhjet dhe lufta kundër terrorizmit.

Leave a Reply

Your email address will not be published.

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

*

VERZIONI DESKTOP