Saimir Pirgu sukses me operën ”Madama Butterfly” në Cyrih të Zvicrës
Tenori shqiptar me famë botërore Saimir Pirgu u rikthye në skenën e Shtëpisë së Operës në Cyrih të Zvicrës me operën ”Madama Butterfly”.
Premiera e ”Madama Butterfly” u ngjit në skenë mbrëmjen e djeshme nën drejtimin e regjisorit Ted Huffman, ndërsa, siç transmeton ATSH-ja, ai do të marrë pjesë në plot 11 net shfaqje të cilat do të vijojnë deri më 10 janar.
Pirgu interpreton rolin e togerit Pinkerton nga opera “Madama Butterfly”.
Në prag të premierës, mediat zvicerane kanë dhënë vlerësimet e tyre maksimale për Saimir Pirgun, ndërsa në faqen zyrtare të Teatrit të Cyrihut zëri i kristaltë i tij është vetë promocioni i premierës.
Media të rëndësishme zvicerane si Tages Anzeiger e vlerësojnë tenorin shqiptar për ngrohtësinë që zëri i tij përcjell, duke e krahasuar me tenorin e madh italian Luçiano Pavaroti.
