Kasami: Gostivari është i rëndësishëm dhe do ta ketë mbështetjen e Lëvizjes BESA

Tubim parazgjedhor nën moton “Për jetë të re” mbrëmë në Qendrën e kulturës në Gostivar mbajti Lëvizja BESA, në të cilin e prezantuan programin parazgjedhor.

Lideri i Lëvizjes BESA, Bilall Kasami konsideron se fitorja në Gostivar do të jetë e rëndësishme edhe për shqiptarët edhe për Rajonin e Pollogut dhe dërgoi porosi se do të fitojnë në këto zgjedhje.

“Lëvizja BESA është këtu për t’i dhënë besim Gostivarit. Kandidati ynë Asaf Ademi do të jetë kryesues i Gostivarit dhe do ta çojë komunën përpara. Pollogu është zemra e shqiptarëve në Maqedoni dhe prandaj kemi shumë projekte për zhvillimin e këtij rajoni. Me Asaf Ademin, do të keni mbështetje nga Evropa për zhvillim të Gostivarit dhe mbështetjen e të gjithë shqiptarëve në rajon”, tha Kasami.

Kandidati për kryetar komune nga radhët e Lëvizjes BESA, Asaf Ademi përmendi se komunës së Gostivarit i paraprijnë investime të rëndësishme.

“Kemi projekte të cilat do t’i zgjidhin problemet me të cilat përballen banorët e Gostivarit. Njëri prej projekteve tona më të rëndësishme është gazifikimi i qytetit. Parashikojmë edhe hapje të zonës së lirë ekonomike në pronësi të komunës, me çka do ta zvogëlojmë papunësinë”, tha Ademi.

Bartësi i listës së kandidatëve për anëtarë të këshillit komunal Arafat Shabani i përmendi problemet me të cilat qytetarët e Gostivarit janë përballur viteve të fundit.

“Gostivari me vite të tëra është lënë mënjanë, është harruar. Në çdo sferë të jetës ndjejmë mangësi, në arsim, e shkatërruan mjedisin  jetësor, lejuan që të rinjtë të largohen. Ata erdhën si çlirues, por nuk kanë bërë asgjë tjetër përveç që i mbushën xhepat dhe i punësuan anëtarët e partisë. Me ne këto punë do të përfundojnë njëherë e përgjithmonë, që të gjithë të jemi të barabartë”, tha Shabani.

Nga foltorja, fjalime patën edhe shefi i Shtabit zgjedhor, Emërli Asani, deputeti Fadil Zendeli dhe anëtari i Bordit qendror Rufat Alili.

Leave a Reply

Your email address will not be published.

*

Të nderuar komentues! Duke mos dashur të cenojmë opinionet tuaja, lutemi që ato të mos përmbajnë gjuhë të urrejtjes, fyerje dhe ofendime personale dhe të jenë në lidhje me shkrimin, apo temën për të cilën komentohet. Në të kundërtën, nuk do të publikohen. Ju falenderojmë që na ndiqni dhe ju ftojmë të vazhdoni të jeni pjesë e Portalb.mk

VERZIONI DESKTOP