Ekspertët japin alarmin: Mishi i pasigurt, rrezik për jetën e konsumatorëve
Zinxhiri i hallkave për të pasur një mish të sigurt në vendin tonë nuk funksionon. Eksperti i sigurisë ushqimore Dritan Laçi, në një prononcim për Tv Klan, shprehet se ekzistojnë shumë probleme të cilat vënë në rrezik shëndetin e qytetarëve. Shqetësimet fillojnë që nga matrikullimi dhe identifikimi i kafshëve, deri te transporti i tyre në thertore, apo dhe procesi i therjes dhe magazinimit të mishit.
Respektimi i këtyre hallkave, duke përfshirë dhe kohën e magazinimit të mishit në ambiente frigoriferike është parësor për të pasur një mish sa më të sigurt dhe cilësor.
“Magazinimi në ambiente frigoriferike menjëherë pas therjes është i nevojshëm për të pasur cilësi të mirë të mishit. Më pas, ai duhet lënë 24-48 orë para se të shitet”.
Një tjetër shqetësim për të është mostrajtimi i mbetjeve që vijnë nga therja e kafshëve. Shpeshherë, sipas tij, ato hidhen nëpër lumenj, duke u bërë burim infeksionesh dhe sëmundjesh për qytetarët. “Mbetjet që vijnë si pasojë e therjes së kafshëve nuk u bëhet asnjë lloj trajtimi. Në këtë pjesë jemi në nivelin zero. Mbetjet hidhen nëpër përrenj apo lumenj duke u bërë burim infeksionesh dhe sëmundjesh”.
Vetëm pak ditë më parë, ministri i Bujqësisë Niko Peleshi paralajmëroi nisjen e kontrolleve në çdo thertore, duke paralajmëruar mbylljen e tyre që nuk plotësojnë standardet.
