Shkëndija vazhdon stërvitjet me intensitet të shtuar

Shkëndija është duke ‘konsumuar’ javën e dytë të përgatitjeve që zhvillohen në Belek, ndërsa duke dashur të ngritë sa më lartë nivelin e përgatitjeve fizike të lojtarëve, stafi teknik në krye me gjermanin Tomas Brdariç ka rritur intenzitetin në seancën stërvitore. Standart duke kombinuar palestrën dhe terrenin dy herë në ditë, deri tani futbollistët në mënyrë më të mirë të mundshme realizojnë kërkesat e trajnerëve.

Lodhja është evidente, mirëpo secili prej futbollistëve ka të qartë që përgatitja sa më e mirë në këtë fazë është bazë e mirë për kampionatin.

Sot jashtë procesit stërvitor ka mbetur portieri Kostadin Zahov, i cili është lënë i lirë nga stafi teknik për shkak se ka ndjerë dhimbje në qafë. Shkëndija edhe të martën ka në plan-program dy seanca stërvitore, ndërsa të mërkurën në program është ndeshja e tretë kontrolluese në Antalia përballë ekipit Podbrezova nga Sllovakia.