Deputetët e Kosovës 2000 euro pagë, më të paguarit në Ballkan
Deputetët e Kosovës kanë pagat më të larta krahasuar me deputetët e vendeve fqinje. Njohësit e ekonomisë dhe analistët politikë thonë se në një vend si Kosova me varfëri dhe papunësi të madhe është e papranueshme që pagat e deputetëve të shkojnë deri në 2000 euro.
Shteti më i varfër në rajon paguan më së shumti deputetët e tij. Deri në 2000 euro marrin paga mujore deputetët e Kosovës, derisa ata të Serbisë nuk marrin as 1000 euro në muaj.
Gazeta Zëri ka nxjerrë të dhënat e pagave mujore të shteteve të rajonit dhe del se Kosova edhe në krahasim me Malin e Zi, Maqedoninë dhe Shqipërinë mbetet në top-listë për nga rrogat e deputetëve të saj.
Pas deputetëve të Kosovës të dytët më të paguarit janë ata të Malit të Zi, paga bazë e të cilëve është 1200 euro, pastaj janë deputetët e Shqipërisë me 1080, të Maqedonisë me 1000 dhe të Serbisë me vetëm 860 euro.
Por njohësit e ekonomisë dhe analistët politikë në vend thonë se në një vend me nivel të lartë të papunësisë dhe me varfëri të madhe është e papranueshme që paga e deputetit të jetë shumëfish më e lartë sesa paga mesatare në vend.