Protesta, Selmani: Duan të vendosin për fatin tonë duke anashkaluar interesat tona (FOTO)
Për shkak refuzimit të partive politike që të në bisedime të inkuadrohen edhe përfaqësues të gazetarëve, në protestë kanë dalë, Shoqata e gazetarëve të Maqedonisë, Sindikata e gazetarëve dhe Instituti maqedonas i mediave, raporton Portalb.
Kryetari i SHGM-së, Naser Selmani ka paralajmëruar se nuk do të tërhiqen nga kërkesat dhe se nuk do të ndalen së protestuari derisa edhe ata të jenë pjesë e bisedimeve.
“Duan të vendosin për fatin tonë duke anashkaluar interesat tona. Këtu vendoset se a do të kemi media të lira e profesionale, ose makineri propagandistike në duart e partive politike. I pyesim përfaqësuesit e partive politike se pse kundërshtojnë përfshirjen e gazetarëve dhe mediave në bisedime? Çfarë ka të keqe në propozimet e tyre që nuk i ndajnë me opinionin. Ata kanë obligim t’i sqarojnë opinionit se çfarë zgjidhjesh ofrojnë për mediat. Nga përvoja e dimë se kur politikanët fshihen nga opinion, zakonisht punojnë për interesit e tyre të ngushta partiake dhe nuk shqetësohen për qytetarët”, tha Selmani, raporton Portalb.
Ai ftoi faktorin ndërkombëtarë të mos u ndihmojnë këtyre partive politike. Sipas Selmanit, nëse pak e respektojnë Maqedoninë, nuk duhet të mbështesin qëndrimet e politikanëve. “Ne si gazetarë dhe opinion kemi të drejt të dimë se çka vendoset për fatin tonë”, përfundoi Selmani.
Takimi i grupeve që ishte caktuar për sot në Klubin e deputetëve, në lidhje me çështjen e mediave, është anuluar./Portalb
