Shkupi priti kryetarët e Kryeqyteteve Evropiane të Kulturës për vitin 2025: U diskutua për përvojat dhe sfidat e titullit
Shkupi priti sot një delegacion ndërkombëtar të nivelit të lartë nga qytetet evropiane të Chemnitz (Gjermani), (Itali) dhe Nova Gorica (Slloveni), duke konfirmuar angazhimin për forcimin e bashkëpunimit kulturor evropian në pritje të titullit të Kryeqytetit Evropian të Kulturës 2028, transmeton Portalb.mk.
Në takim morën pjesë kryetarët e Komunave Samo Turel, Radolfo Siberna dhe Josephine Hage, si dhe i ngarkuar me punë ambasadori në detyrë në Delegacionin e Bashkimit Evropian, Ben Nupnau. Diskutimet u përqendruan në shkëmbimin e përvojave, sfidave dhe praktikave të mira në lidhje me përgatitjet dhe zbatimin e këtij titulli prestigjioz evropian.
Si pjesë e vizitës, delegacioni shëtiti nëpër zonën qendrore të qytetit të Shkupit, duke u njohur me trashëgiminë kulturore dhe historike të qytetit, e cila u pasua nga një takim zyrtar në Shtëpinë e Evropës në Shkup, si një hapësirë për dialog, ide dhe vizion për zhvillimin e ardhshëm.
Nikoqiri i takimit theksoi se Kryeqyteti Evropian i Kulturës nuk është vetëm njohje, por edhe një proces hapjeje, të mësuari dhe lidhjeje, në të cilin kultura bëhet një nxitës i transformimeve shoqërore dhe urbane. U theksua veçanërisht rëndësia e bashkëpunimit ndërkombëtar dhe shkëmbimit të përvojave me qytetet që tashmë e kanë zbatuar me sukses këtë rol.
Takimi u vlerësua si një hap i rëndësishëm në ndërtimin e partneriteteve afatgjata, të cilat do të kontribuojnë në forcimin e identitetit kulturor evropian dhe krijimin e mundësive të reja për qytetarët, artistët dhe institucionet.
Si pjesë e programit, sonte në Muzeun e Qytetit të Shkupit do të hapet ekspozitë, e cila do të jetë në dispozicion të publikut nga 15 deri më 26 prill. Ekspozita është simbol i vizionit të përbashkët, lidhjes kulturore dhe partneritetit midis qyteteve.
“Shkupi vazhdon me një ritëm të përshpejtuar të përgatitjeve për vitin 2028, me një qëllim të qartë – të ndërtojë një qytet më të hapur, krijues dhe të lidhur, i cili do të kontribuojë në mënyrë aktive në skenën kulturore evropiane”, thonë nga Qyteti i Shkupit.
Kryeqyteti i Maqedonisë më 20 shtator 2023 është shpallur Kryeqytet evropian i kulturës për vitin 2028. Shkupi është një nga tre kryeqytetet evropiane të kulturës. Përveç Shkupit, kryeqyteti i kulturës evropiane tashmë është shpallur edhe qyteti çek Çeske Bugjejovice dhe Bourges (Francë).