Një gjykatës i Gjykatës së Lartë të Brazilit ka urdhëruar ndërprerjen e rrjetit social X në të gjithë vendin, transmeton Anadolu.
Vendimi erdhi dje pas akuzave se X, në pronësi të miliarderit Elon Musk, ka shpërfillur vazhdimisht urdhrat dhe rregulloret e gjykatës braziliane.
“Pas moszbatimit të përsëritur, të vetëdijshëm dhe të qëllimshëm të urdhrave të gjykatës dhe moszbatimit të gjobave ditore të vendosura, përveç përpjekjes për të mos iu nënshtruar sistemit ligjor dhe gjyqësorit brazilian, për të krijuar një mjedis të pandëshkueshmërisë totale dhe ‘tokë të paligjshme’ në rrjetet sociale braziliane, duke përfshirë zgjedhjet komunale të vitit 2024”, tha gjykatësi Alexandre de Moraes.
Gjykata theksoi se platforma X ka qenë një kanal për fjalime urrejtjeje dhe raciste, si dhe ka ndërhyrë në proceset demokratike të vendit.
Më 28 gusht, Moraes i dha Musk-it 24 orë për të emëruar një përfaqësues ligjor në Brazil, duke paralajmëruar se dështimi për ta bërë këtë do të rezultonte në pezullimin e rrjetit social X në vend.
Qeveria braziliane më parë kishte thirrur Musk-in për refuzimin e heqjes së postimeve dhe profileve që shpërndanin dezinformata dhe përmbajtje urrejtjeje në X. Në përgjigje të ankesave dhe gjobave në rritje nga gjyqësori brazilian, Musk mbylli zyrat e X në vend javën e kaluar.
Qeveria braziliane ka ndaluar disa llogari, duke përfshirë ato të aleatëve dhe simpatizantëve të ish-presidentit Jair Bolsonaro, i cili akuzohet se dyshohet se ka komplotuar një grusht shteti kundër presidentit Luiz Inacio Lula da Silva.
Gjykatat konstatuan se këto llogari shkelnin ligjin duke përhapur informacione të rreme dhe duke minuar institucionet demokratike. X është gjobitur mbi 3 milionë dollarë për refuzimin e tij për të bllokuar këto llogari.
Gjykata e Lartë ka njoftuar Agjencinë Kombëtare të Telekomunikacionit (Anatel) që të shkëputë rrjetin social në mbarë vendin brenda 24 orëve. Kompanive si Apple dhe Google u janë dhënë pesë ditë kohë për të hequr aplikacionin X nga aplikacionet e tyre online.
Musk ka kritikuar në X gjykatësin Moraes, duke e quajtur atë një “diktator të keq që luan si gjyqtar”. Ai ende nuk ka lëshuar një deklaratë zyrtare në lidhje me gjobat dhe hetimet e fundit nga gjyqësori i Brazilit.