Pas përmbytjeve shkatërruese në Bosnjë dhe Hercegovinës, në të cilat humbën jetën të paktën 18 persona, komuna e Jabllanicës shpalli tri ditë zie, raporton televizioni boshnjak BHRT, transmeton Portalb.mk.
Me vendim të autoriteteve lokale, ditë zie janë e diela (sot), e hëna dhe e marta. Shumica vdiqën në Jabllanicë, 13, dy në zonën e Konjicit dhe tre në Fojnicë. Përveç viktimave njerëzore, përmbytjet kanë shkaktuar edhe dëme të mëdha materiale.
Ekipet e shpëtimit janë ende sot në terren në kërkim të personave të zhdukur. U kërkua edhe ndihma ndërkombëtare dhe u përgjigjën dhjetë vende nga rajoni dhe Bashkimi Evropian. Në përpjekje për të ndihmuar popullatën e prekur, ekipet e shpëtimit nga Bosnja dhe Hercegovina, Kroacia dhe Serbia janë përfshirë në operacionet e shpëtimit dhe situata është më e vështira në Jabllanicë, Fojnicë, Kreshevë dhe Kiseljak. Vetëm në zonën e Jabllanicës dhe Konjiqit janë duke u kërkuar 10 deri në 15 persona.
Më parë, Bosnja dhe Hercegovina aktivizoi Mekanizmin e Mbrojtjes Civile të BE-së (EUCPM) dhe ekipet e reagimit do të mbërrijnë në vendngjarje, konfirmoi kreu i delegacionit të BE-së në BiH, Luigi Soreka. Të paktën 18 persona humbën jetën në përmbytjet katastrofike që përfshiu vendin dhe qindra mbetën të pastrehë. Disa prej tyre qëndrojnë në hotelet lokale dhe në Shtëpinë e të moshuarve në Jabllanicë, dhe shumica qëndrojnë me miqtë dhe të afërmit në banesa dhe shtëpi familjare në Jabllanicë dhe Konjicë.