Ministria për Kulturë në Maqedoninë e Veriut ka vendosur që Qyteti i kulturës për vitin 2024 të jetë qyteti i Kriva Pallankës. Të drejtë pjesëmarrje kanë të gjitha komunat, duke përjashtuar Shkupin, transmeton Portalb.mk.
“Komuna e Kriva Pallankës do të jetë organizator i manifestimit “Qyteti i kulturës” në vitin 2024, vendosi komisioni pas konkursit të shpallur nga Ministria për Kulturës, që ishte i publikuar në Portalin nacional e-shërbime”, njoftoi Ministria.
Në këtë konkurs kishte aplikuar edhe Komuna e Velesit.
“Komisioni profesional i përbërë nga të punësuarit në Ministrinë për Kulturë, vlerësoi që Komuna e Kriva Pallankës ka program të pasur, që ofron koncept të qëndrueshëm programor, me lloje dhe estetikë të ndryshme nga krijimtaria tradicionale dhe bashkëkohore, me pjesëmarrjen e artistëve vendor dhe të huaj”, raportoi Ministria.
Programi i Kriva Pallankës përmban 55 projekte nga të gjitha veprimtaritë, që do të fillojnë të realizohen nga muaji mars e deri në fund të vitit.