Pas një incidenti me presidenten e Kosovës Vjosa Osmani në Aeroportin Ndërkombëtar të Shkupit me kontrollin kufitar, opozita në vend kërkon zbardhjen e plotë të ngjarjeve. Zyra e Osmanit akuzoi autoritetet e Maqedonisë për shkelje të praktikës ndërkombëtare dhe të Konventës së Vjenës për Marrëdhënie Diplomatike, duke thënë se më 1 gusht, një anëtar i ekipit të sigurisë në Aeroportin e Shkupit (TAV) ka tentuar t’ia marrë telefonin personal presidenties së Kosovës. Nga MPB-ja e Maqedonisë njoftuan se janë duke marrë masa për rastin, transmeton Portalb.mk.
“Menjëherë është njoftuar Departamenti për Kontroll të Brendshëm, Hetime Penale dhe Standarde Profesionale dhe po merren masa për zbardhjen e rastit në koordinim me Prokurorinë Publike për NKOK, pas së cilës do të dorëzohen parashtresat përkatëse”, thuhet në njoftimin e MPB-së së Maqedonisë së Veriut.
Nga TAV, kompania që menaxhon me Aeroportin e Shkupit, sërish kanë dërguar kumtesë në lidhje me incidentin me presidenten e Kosovës në këtë Aeroport. Nga kjo kompani thonë se kanë respektuar rregullat, gjegjësisht që Ministria e Punëve të Brendshme ka udhëzuar që delegacioni t’i nënshtrohet kontrollit standard në aeroport.
“I hedhim poshtë kategorikisht akuzat se punonjësi ynë nga departamenti i sigurisë ka tentuar të marrë telefonin. Telefoni i është kërkuar për t’iu nënshtruar kontrollit (skriningut) të detyrueshëm të sigurisë përmes aparatit me rentgen. Në bazë të Dokumentit 30 të ECAC (Doc.30) dhe Programit Kombëtar të Sigurisë së Aviacionit Civil, të gjithë pasagjerët, bagazhet e kabinës dhe sendet e tyre personale që udhëtojnë në një fluturim komercial, si në këtë rast, i nënshtrohen kontrollit të sigurisë. Nëse nuk jemi të harmonizuar me këto rregulla, piloti i fluturimit do të refuzojë hipjen në avion të pasagjerit. Konventa e Vjenës për Marrëdhënie Diplomatike i përjashton nga kontrolli i sigurisë vetëm mysafirët zyrtarë të Qeverisë së Republikës së Maqedonisë së Veriut dhe operatori i aeroportit merr njoftim zyrtar për përjashtime të tilla nga Ministria e Punëve të Brendshme. Udhëzimet që ka marrë Departamenti ynë i Sigurisë nga Departamenti për Mbrojtjen e Disa Personave dhe Objekteve thonë qartë se anëtarët e delegacionit duhet t’i nënshtrohen një kontrolli standard të sigurisë në përputhje me procedurat e përcaktuara”, thuhet në njoftimin e plotë të TAV.
Në një deklaratë me shkrim, LSDM-ja opozitare pyet nëse po fshihet versioni i vërtetë i asaj që ka ndodhur dhe për cilat arsye, sepse në publik janë shfaqur tri versione të skandalit diplomatik.
“A është e vërtetë se një person nga sigurimi i (Kryetarit të Kuvendit Afrim Gashi) ka kërcënuar me armë zjarri punonjës të TAV-it dhe cili ishte roli i tij? A do ta hetojë dhe raportojë me detaje Ministria e Punëve të Brendshme apo do të përpiqet ta fshehë rastin?”.
Ndërkohë, zëvendëskryeministri i parë në Qeverinë e Maqedonisë së Veriu, Izet Mexhiti, tha se incidenti ishte një “keqkuptim”, mes Ministrisë së Brendshme, Aeroportit të Shkupit dhe sigurimit të presidentes kosovare.
Mexhiti, akuzoi Bashkimin Demokratik për Integrim në opozitë se ka tentuar “të prodhojë një krizë artificiale”, pasi autoritetet maqedonase liruan nga paraburgimi një ish-ushtar të Ushtrisë Çlirimtare të Kosovës, që ishte ndaluar nga autoritetet maqedonase në bazë të një fletarrestimi të lëshuar nga Serbia përmes INTERPOL-it.
“Ftoj BDI-në të tregojë seriozitet dhe pjekuri politike dhe të sillet si opozitë konstruktive. Raportet ndërshtetërore mes Maqedonisë së Veriut dhe Kosovës janë të shkëlqyeshme dhe do të vazhdojnë të jenë të tilla, dhe ato nuk mund t’i cenojë frustrimi opozitar i një partie politike dhe megafonëve të saj që bëjnë lajme të rrejshme për honorarë të majmë”, shkroi ai në Facebook.
Ish-ministri i Punëve të Jashtme nga radhët e BDI-së, Bujar Osmani, ka dënuar, siç tha ai, veprimin e papranueshëm dhe skandaloz në aeroportin e Shkupit ndaj presidentit të Kosovës.
“Ky incident tregon qartë paaftësinë dhe papërgjegjshmërinë e përfaqësuesve të paligjshëm shqiptarë në qeveri. Duhet përgjegjësi të menjëhershme nga uzurpuesit e përfaqsimit shqiptarë në Qeveri dhe mbajtjen në llogari të atyre që janë përgjegjës për këtë situatë të turpshme”, ka shkruar ish-ministri Osmani në profilin e tij zyrtar në Facebook.
Paraprakisht, më 1 gusht, këshilltari për media i presidente Osmani tha se sigurimi në aeroportin e Shkupit, në kundërshtim me praktikat ndërkombëtare, ka tentuar t’ia marrë telefonin dhe çantën personale Osmanit, por edhe se sigurimi i aeroportit e ka shtyrë fizikisht. Për incidentit Osmani ka njoftuar kryetarin e Kuvendit të Maqedonisë së Veriut, Afrim Gashi, pas së cilës kanë ndërhyrë pjesëtarët e sigurimit të tij.
Kompania TAV Maqedoni ka reaguar duke thënë se kanë bërë kontroll standard të sigurisë dhe se si operator aeroporti kanë detyrim ligjor që të bëjnë kontroll të sigurisë të të gjithë pasagjerëve, bagazheve dhe mallrave në fluturimet nga Aeroporti Ndërkombëtar i Shkupit dhe nga Aeroporti Shën Apostol Pavle Ohër, duke përfshirë pasagjerët që udhëtojnë nëpër sallonin VIP.
Pas incidentit, nga kabineti i Gashit kanë njoftuar shkurt se pjesëtarët e sigurimit të tij, të cilët janë punonjës të MPB-së, kanë ndërhyrë për të qetësuar situatën dhe për të ndihmuar kolegët e tyre që të zbatojnë procedurat e sigurisë gjatë vizitës së personave VIP.