Në pranim-dorëzimin e funksionit të kryeministrit në Qeveri, Mickoski dhe Xhaferi patën një takim të shkurtër, pa asnjë deklaratë për media. Mickoski është kryeministri i 13-të, i cili do të udhëheqë qeverinë e 20-të që nga pavarësia e vendit, transmeton Portalb.mk.
“Gjatë pranim dorëzimit zyrtar të funksionit kryeministror, Kryeministrit të sapo zgjedhur Hristijan Mickoski i urova punë të suksesshme dhe efikase në interes të të gjithë qytetarëve. I theksuam zgjedhjet e lira, korrekte dhe demokratike si vlerë e shtuar e euro integrimeve. Shpreha shpresë se subjektet politike do të tregojnë nivel të lartë të vetëdijes politike dhe do të jenë të hapur për bashkëpunim për prioritetet strategjike të shtetit”, shkroi Xhaferi në Facebook.
U konstatua se Qeveria kalimtare dhe institucionet shtetërore u përgjigjën me sukses detyrës për organizimin e proceseve zgjedhore të lira, korrekte dhe demokratike dhe mundësuan pranim dorëzim të qetë dhe demokratik të pushtetit. Kjo u vlerësua si kontribut në sjelljen evropiane të shtetit, i cili synon anëtarësimin e plotfuqishëm në Bashkimin Evropian.
“Kryeministri i deritanishëm Xhaferi, sugjeroi se shtetit, si edhe deri tani, edhe më tej i nevojiten reforma cilësore, me qëllim të avancimit të cilësisë së jetës së qytetarëve sipas standardeve dhe vlerave evropiane dhe demokratike. U shpreh edhe shpresë për nivel të lartë të ndërgjegjes politike dhe bashkëpunim rreth prioriteteve strategjike”, thuhet në njoftimin e Qeverisë.
Ministrat e rinj po vijnë në krye të detyrës
Përveç kryeministrit, ceremonitë e dorëzimit në ministri kanë edhe ministrat aktualë në Qeverinë teknike dhe ministrave të sapozgjedhur.
“Në periudhën në vijim vëmendje më e madhe do t’i kushtohet ndryshimeve në Ligjet për Këshillin Gjyqësor, për Prokurorinë Publike, për Këshillin e Prokurorëve Publikë, zbatimi i agjendës së reformës në kuadër të procesit të zbatimit të Planit të Rritjes së Ballkanit, Udhërrëfyesi për qeverisjen e së drejtës që do të përshkruajë drejtimet e reformave dhe masave deri në qëllimin përfundimtar – përfundimin e negociatave, si dhe përfshirjen e vendeve kandidate në Raportin e Sundimit të Ligjit si instrument. për zbulimin e hershëm apo parandalimin e sfidave me sundimin e ligjit”, thuhet në deklaratën e Ministrisë së drejtësisë.
Ministrja e deritanishme Kaja Shukova, ia dorëzoi detyrën ministrit të sapoemëruar të Mjedisit Jetësor dhe Planifikimit Hapësinor Izet Mexhitit. Shukova e njoftoi Mexhitin për proceset dhe sfidat aktuale në mjedis dhe i uroi suksese në kryerjen e funksionit.
Ministri Mexhiti njoftoi se në të ardhmen Ministria e Mjedisit Jetësor dhe Planifikimit Hapësinor do të propozojë dhe zbatojë politika për përmirësimin e mjedisit, si dhe të cilësisë së jetës së qytetarëve, si prioritet absolut dhe se në këtë sfidë Qeveria do të jetë së bashku me qytetarët dhe sektorin civil për çdo iniciativë që synon të mirën e përbashkët.
Ndërkohë në ceremoninë e dorëzimit, ministri Toshkovski falënderoi Bushin për angazhimin e deritanishëm në këtë ministri.
Vllado Misajllovski nga ana tjetër në fjalimin e parë para punonjësve të Ministrisë së Mbrojtjes dhe Ushtrisë theksoi se merr përsipër të punojë në forcimin e reputacionit dhe pozitës ndërkombëtare të shtetit dhe prioritet kryesor do të jetë aktivizimi i plotë i të gjitha resurseve në dispozicion në mënyrë që për të mbrojtur interesat kombëtare.
“Proceset e reformës do të jenë në krye të agjendës, sipas objektivave të aftësisë së NATO-s, ne do të përditësojmë në përputhje me rrethanat kuadrin strategjik që është baza për zbatimin e proceseve reformuese në fushat kyçe të mbrojtjes. Me këto reforma do të përforcohen proceset e modernizimit të Armatës, bashkëpunimi ndërkombëtar, sistemi i burimeve njerëzore, edukimi dhe trajnimi i personelit, mbështetja logjistike, infrastruktura ushtarake, sistemi i komunikimit dhe mbrojtja kibernetike”, theksoi ministri Misajllovski.
Ministri i Punëve të Jashtme dhe Tregtisë së Jashtme, Timço Mucunski, në ditën e parë të mandatit do të udhëtojë në Luksemburg, ku do të marrë pjesë në takimin e ministrave të Punëve të Jashtme të Bashkimit Evropian dhe vendeve të Ballkanit Perëndimor. Ngjarja mbahet në kuadër të Këshillit për Punë të Jashtme të BE-së dhe organizohet nga nënkryetari i Komisionit Evropian dhe Përfaqësuesi i Lartë i BE-së për Politikë të Jashtme dhe Siguri, Josep Borrell.
Në takim do të diskutohet për proceset integruese evropiane të vendeve të Ballkanit Perëndimor, si dhe modalitetet për forcimin e bashkëpunimit dhe prezencën e BE-së në rajonin tonë.
Taravari, bëri të ditur se gjatë mandatit të tij do të ndërmarrë reforma në sferën e drejtësisë dhe forcimin e luftës kundër krimit dhe korrupsionit, depolitizimin e gjyqësorit dhe prokurorisë, rikthimin e besimit të qytetarëve në sistemin e drejtësisë dhe sundimin e ligjit.
Durmishi, premtoi se për bizneset do të krijojnë klimë sa më të volitshme për zhvillim dhe investime.
“Do të lehtësojmë procedurat administrative. Kompanitë vendase do të subvencionohen që të kthejnë në vendlindje edhe kuadrot më të mirë që kanë braktisur vendin, ndërsa për kompanitë e huaja do të sigurojmë rrethana sa më lehtësuese për investim dhe konkurrencë korrekte”, thuhet në njoftimin e Lëvizjes Besa.
Orhan Murtezani mori funksionin e ministrit për Çështje Evropiane. Në facebook, Murtezani shkruan se tani është koha për veprim.
“Edhe zyrtarisht e pranova detyrën e Ministrit për Çështje Europiane. Falënderoj qytetarët që i besuan koalicionit VLEN dhe kryesinë e Alternativës që ma besoi këtë pozitë. Tani kalojmë në veprim, duke mbajtur në mendje gjithmonë interesin e qytetarëve, përcaktimin e tyre për ndryshim rrënjësor dhe interesin strategjik të vendit për integrim europian. Na priftë e mbara!”, ka shkruar Murtezani.
Në Ministrinë e Financave poashtu është bërë pranim-dorëzimi i funksionit të ministrit të Financave. Ministrja e re, Gordana Dimitrieska-Koçoska e mori funksionin nga ministri i deritanishëm i Financave, Fatmir Besimi.
Gjatë takimit, Besimi e informoi ministren e re me aktivetet dhe projektet e deritanishme në të cilat po punon Ministria e Financave. Gjatë këtij takimi u theksua se Ministria e Financave ka rol të rëndësishëm dhe se është shumë me rëndësi të zbatohen reformat të cilat do të sigurojnë qëndrueshmëri në financa dhe rritje ekonomike.
Këto janë ministrat e rinj:
- Izet Mexhiti – zëvendëskryeministër dhe Ministër i Mjedisit
- Arben Taravari – Ministër i Shëndetësisë
- Orhan Murtezani – Ministër për Çështje Evropiane
- Fatmir Limani – Ministër i Politikës Sociale, Demografisë dhe Rinisë
- Besar Durmishi – Ministër i Ekonomisë dhe Punës
- Igor Filkov- Ministër i Drejtësisë
- Pançe Toshkovski – Ministër i MPB-së
- Vllado Misajllovski – Ministër i Mbrojtjes
- Timço Mucunski – Ministër i Punëve të Jashtme dhe Tregtisë së Jashtme
- Zoran Lutkov – Ministër i Kulturës dhe Turizmit
- Aleksandar Nikoloski -zZëvendëskryeministër dhe Ministër i Transportit dhe Lidhjeve
- Ljupço Dimovski – zëvendëskryeministër dhe Ministër i Sistemit Politik
- Gordana Dimitrioska Koçoska – Ministre e Financave
- Vesna Janevska – Ministre e Arsimit dhe Shkencës
- Zllatko Perinski – Ministër i Vetëqeverisjes Lokale
- Sanja Bozhinovska – Ministre e Energjisë, Minierave dhe Burimeve Minerale
- Cvetan Tripunovski – Ministër i Bujqësisë, Pylltarisë dhe Menaxhimit të Ujërave
- Stefan Andonovski – Ministër i Shoqërisë Informative dhe Transformimit Digjital
- Goran Minçev – Ministër i Administratës Publike
- Borko Ristovski – Ministër i Sportit
- Shaban Saliu – ministër pa portofol i ngarkuar për integrimin dhe zbatimin e dekadës së romëve
Me 77 vota “për” dhe 22 vota “kundër”, Kuvendi zgjodhi mbrëmë Qeverinë e re, kryetar i së cilës është Hristijan Mickoski. Koalicioni qeveritar përbëhet nga VMRO-DPMNE, koalicioni “VLEN” dhe ZNAM.
Në votimin e mbrëmshëm “kundër” Qeverisë së re u deklaruan deputetët e LSDM-së dhe të Majtës, ndërsa deputetët e koalicionit “Fronti Evropian” i udhëhequr nga BDI-ja e lanë seancën para përfundimit të saj.
Hristijan Mickoski e mori mandatin për të formuar qeverinë e re pasi partia e tij fitoi zgjedhjet parlamentare në maj të këtij viti dhe fitoi 58 ulëse në Kuvend.