Nikolla Gruevski shpëton plotësisht nga vuajtja e dënimit me dy vjet burg për rastin “Tanku”, për blerjen e “Mercedesit” luksoz, shkruan Prizma, transmeton Portalb.mk.
Më 4 tetor 2018 u dënua përfundimisht dhe deri më 4 tetor kanë kaluar gjashtë vite.
Është koha e plotë, në të cilën sipas Kodit Penal skadon vuajtja e dënimit.
Sipas ligjit, “parashkrimi i ekzekutimit të dënimit ndodh në çdo rast kur ka kaluar dyfishi i kohës nga sa kërkohet me ligj për parashkrimin e ekzekutimit të dënimit”.
Dhe në dënimin e Gruevskit, krimi skadon për tre plus tre vjet.
Me fjalë të tjera, nëse nesër do të paraqitej në Maqedoninë e Veriut, nuk do të ishte në burg për këtë krim për të cilin u dënua.
Gjatë qëndrimit në Maqedoninë e Veriut, Gruevski ka thënë se akuzohet se ka “dëshiruar” të blejë një veturë luksoze për përfitime politike dhe se ka qenë viktimë e përndjekjes politiko-juridike.
Ish-kryeministri, Zoran Zaev, ka paralajmëruar se do ta shesin “Mercedesin” dhe me paratë do të blejnë autoambulanca, por vetura është ende në lëvizje. Informatat se automjeti është ende në përdorim i ka konfirmuar drejtori i Shërbimit për Punë të Përgjithshme dhe të Përbashkët, Ivica Tomovski.
Ai tha për BIRN se në të ka hipur një delegacion i lartë amerikan dhe italian dhe se përdoret rregullisht kur ka nevojë.
Për të njëjtin rast, Gordana Jankulloska është dënuar me 4 vjet burgim, ndërsa Gjoko Popovski me 4.6 vjet. Ata vuajtën dënimin.
Ish-kryeministrit i kanë mbetur edhe një vit e gjysmë burg për rastin “Dhuna përballë Komunës Qendër”, i cili skadon për tre vjet, pra në vitin 2027.
Më së voni, nëntë vjet burgim për rastin “Parcelat në Vodno” do t’i skadojnë në vitin 2043.
Por në këtë rast, Gruevski u dënua në mungesë dhe nëse do të kthehej, ai mund të kërkonte rigjykim, që do të thotë se do të gjykohej përsëri.
Me kalimin e viteve dhe pas ndryshimeve në Kodin Penal, u vjetërsuan lëndët TNT, për prishjen e kompleksit “Kosmos” dhe “Trajektorja”, për komisionet për ndërtimin e autostradave. Ndryshimet e shpëtuan edhe Gruevskin nga akuza për rastin “Shkupi 2014”, “Feniks”.
Ish-kryeministri mbetet i akuzuar për çështjet “Talir 1” dhe “Talir 2”, mbi të cilat varet edhe paqartësia se si do të përfundojnë, si dhe në rastin “Titanik”, ku akuzohet për shpërdorim fondesh për financimin e fushatës zgjedhore dhe cenimin e të drejtës së votës.
Për shkak se ai ishte i padisponueshëm, pezullohet edhe hetimi për ndërhyrjen e dhunshme në Kuvend të datës 27 prill 2017.
Në nëntor do të mbushen gjashtë vjet që kur ai u arratis në Hungari dhe mori azil politik.
Të gjitha lajmet lidhur me ish-kryeministrin Nikolla Gurevski i gjeni KËTU.