Zjarri përfshiu hotelin Grand Kartal në resortin malor verior të Kartalkaya më 21 janar. Hetuesit thanë se normat e sigurisë ishin shkelur, transmeton France24.
Përveç 78 të vdekurve, 137 persona u plagosën. Familje të tëra u dogjën në flakë dhe të afërmit vendosën fotografi të viktimave jashtë një palestre në qytetin verior të Bolu-së, të përdorur për seancat dëgjimore.
Pronari, menaxheri i hotelit dhe disa anëtarë të bordit të hotelit ishin midis atyre që u dënuan me burgim të përjetshëm nga gjykata, sipas raportimeve të mediave për gjyqin.
Një nënkryetar bashkie në Bolu dhe shefi i zjarrfikësve lokalë u dënuan gjithashtu me burgim. Tridhjetë e dy persona, 20 prej të cilëve ishin mbajtur në paraburgim, u përballën me akuza në seancën dëgjimore.
Hetimi zbuloi se alarmi i zjarrit nuk kishte funksionuar natën e zjarrit dhe se disa nga pajisjet e gazit nuk përmbushnin normat e sigurisë.
“Ne kishim inspektime të rregullta,” i tha gjykatës Halit Ergul, pronar i Grand Kartal, të cilit iu dha burgim i përjetshëm. Ai mohoi përgjegjësinë dhe fajësoi furnizuesin e pajisjeve të gazit.
“Nuk lejova as fishekzjarrë para hotelit për dasma sepse nuk doja që zogjtë të ngordhnin”, tha ai, sipas agjencisë së lajmeve DHA.
Njerëzit që i shpëtuan flakëve dhe të afërmit e të vdekurve dhanë dëshmi me lot në gjykatë për zjarrin që shpërtheu në hotel pak para orës 3:30 të mëngjesit.
“Unë shkoj në varreza çdo ditë. Asnjë psikolog nuk mund ta lehtësojë një dhimbje të tillë”, tha Hilmi Altin, i cili humbi gruan dhe vajzën nëntëvjeçare në katastrofë.