Komisioni për Përcaktimin e Përgjegjësisë Disiplinore në Prokurorinë Publike të Republikës së Maqedonisë së Veriut, pas kryerjes së dy procedurave disiplinore, përcaktoi se Prokurori i Lartë Publik i Prokurorisë së Lartë Publike të Shkupit, Mustafa Hajrulahi, dhe një prokuror tjetër publik, Jovan Cvetanovski, nga i njëjti institucion, kanë kryer shkelje të rënda disiplinore, në përputhje me nenin 91, paragrafi 6 i Ligjit për Prokurorinë Publike, transmeton Portalb.mk.
“Komisioni për Përcaktimin e Përgjegjësisë Disiplinore të Prokurorit Publik në Kryerjen e Funksionit të Prokurorit Publik në Prokurorinë Publike të Republikës së Maqedonisë së Veriut, pas kryerjes së plotë të dy procedurave disiplinore dhe shqyrtimit të fakteve dhe rrethanave, pranoi propozimet e paraqitura nga Prokurori Publik i Republikës së Maqedonisë së Veriut dhe vendosi që Prokurori i Lartë Publik i Prokurorisë së Lartë Publike Shkup dhe një prokuror tjetër publik nga Prokuroria e Lartë Publike Shkup kanë kryer shkelje të rënda disiplinore sipas nenit 91, paragrafi 6 i Ligjit për Prokurorinë Publike, përkatësisht kanë bërë me dashje dhe pa të drejtë gabime të mëdha profesionale”, thuhet në njoftimin e Prokurorisë.
Bazuar në provat e paraqitura, Komisioni përcaktoi se prokurori publik nga Prokuroria e Lartë Publike Shkup, kundër të cilit është zhvilluar një procedurë, ka vepruar në mënyrë joprofesionale dhe neglizhente në 4 raste në të cilat ai ka hequr dorë nga ankesa ose aktakuza. Për këtë, këtij prokurori publik iu shqiptua masa disiplinore – ulje e pagës prej 30% të pagës për një periudhë prej 6 muajsh nga data e hyrjes në fuqi të vendimit.
“Dy procedura të veçanta disiplinore u zhvilluan për prokurorin e Lartë Publik të Prokurorisë së Lartë Publike të Shkupit. Në njërën prej tyre, Komisioni e gjeti atë përgjegjës për parregullsi në mënyrën e ngritjes së çështjeve në Prokurorinë e Lartë Publike të Shkupit, dhe në tjetrën për vendime joprofesionale të marra në tre nga rastet, pasi çështjet iu referuan atij dhe vendimet u morën me pëlqimin e tij. Duke pasur parasysh shkeljet e rënda disiplinore të konstatuara në të dyja procedurat, u vendos që t’i paraqitet propozim Këshillit të Prokurorëve Publikë për shkarkimin e Prokurorit të Lartë Publik të Prokurorisë së Lartë Publike të Shkupit”, thuhet më tej në njoftim.
Vetëm në lidhje me pretendimet për një shkelje tjetër të rëndë disiplinore të kryer nga Prokurori i Lartë Publik i Prokurorisë së Lartë Publike të Shkupit, e cila i referohej dëmtimit të reputacionit të Prokurorisë Publike, Komisioni vendosi është vjetërsuar propozimi.
Kujtojmë se në nëntor të vitit 2024, Këshilli i Prokurorëve Publikë mori vendim me të cilin konfirmoi vendimin për shkarkimin e prokurorit të lartë publik Mustafa Hajrullahi nga posti, të marrë nga kryeprokurori. Ankesa e Hairullahit u refuzua si e pabazuar.
Prokurori i lartë publik në Prokurorinë e Lartë Publike Shkup, Mustafa Hajrullahi, pas pezullimit nga detyra, në një konferencë për media ka akuzuar se kallëzimi penal kundër tij nga prokurori publik republikan ka tendencë për ta larguar dhe heshtur, si dhe për të frikësuar edhe kolegët e tjerë që veprojnë në përputhje me ligjin, dhe të gjitha me qëllim, siç tha ai, për të marrë vendime të urdhëruara.
Vendimi për suspendimin e Hajrullahit erdhi pasi Prokuroria Themelore Publike Shtip kishte lëshuar urdhër për zhvillimin e procedurës hetimore ndaj tij, për të cilin ekziston dyshimi i bazuar se ka kryer veprën penale të vazhdueshme “ngacmimi gjatë kryerjes së detyrës” nga neni 143, si dhe vazhdimi i veprës penale të “keqpërdorimit të pozitës dhe autoritetit zyrtar” nga neni 353 i Kodit Penal.