Pothuajse gjashtë muaj pas fitores së zgjedhjeve parlamentare në Holandë, lideri populist anti-islamik Geert Wilders ka arritur marrëveshje për të formuar qeveri me tre parti të tjera. Deri më tani nuk është marrë asnjë vendim se kush do të jetë kryeministër, por nuk do të jetë Wilders, i cili më parë dha dorëheqjen për të krijuar koalicion, transmeton Portalb.mk.
“Ne kemi një marrëveshje dhe tani do ta paraqesim në parlament”, tha kreu i Partisë së Lirisë (PVV) të ekstremit të djathtë.
Nëse marrëveshja pranohet, partia e Wilders do të formojë një qeveri së bashku me VVD-në konservatore-liberale, Marrëveshjen e Re Sociale centriste dhe Lëvizjen Qytetare të Fermerëve.
Partia e Lirisë fitoi çuditërisht një të katërtën e votave në zgjedhjet e nëntorit pasi braktisi disa nga politikat e saj radikale, si ndalimi i Kuranit dhe xhamive. Megjithatë, bisedimet për të formuar një koalicion prej katër partish dështuan në shkurt, pas së cilës Wilders hoqi dorë nga ambicia e tij për të qenë kryeministër. I preferuari i ri për këtë pozicion është 67-vjeçari Ronald Plasterk, i cili hoqi dorë nga karriera e tij si profesor dhe biolog molekular për t’u futur në politikë.