“MIQ”
Shiu kishte bërë qull këpucët e saj me kordele të harruara në pragun e derës jashtë. Ajo po pinte një gotë verë të kuqe dhe po i ridëgjonte për kushedi të satën here vargjet e këngës “MIQ” të Elina Dunit.
Sot më shumë se kurrë ndjeu nevojën e heshtjes. Deshi të heshtte por me dikë, mbase me atë .
Pjesë e mendimeve të saj ngatërroheshin në fytyrën e tij edhe pse se kishte parë që nga shiu i kaluar që ra.
Ata në të shumtën e kohës ishin si dy vija paralele që puthiteshin diku rastësisht ndonjëherë, e pastaj kryqëzoheshin këto vija në mënyrën më të çuditshme për tu ndarë e për të vazhduar paralelizmin ironik më pastaj …
Kishte diçka të pambaruar mes tyre në fakt…shume puthje të frenuara, përqafime të padhëna, fjalë të menduara e të pathëna. Ai e deshi si budalla, ajo e deshi si e çmendur. Përjetësia ishte në buzët dhe sytë e tyre e shpeshherë parajsa i xhelozonte për atë që dy miqtë e vdekshëm bënin në Tokë.
E pas asaj si për inat largësia dhe ftohtësia hynte mes tyre,… ah ai inat i tij i paparë, ah ajo kokëfortësi e saj mazohiste.
Grindje, inate, ndarje, largim, urrejtje…pas katër muajve i merrte malli dhe harronin gjithçka. Takimet e tyre kishin një grusht magjie të çuditshme që brenda ca sekondave i tretnin gjithë muajt e pritjeve sado të gjata qofshin ato, plot e përplot inate e kryeneçësi.
Mbase disa femra kanë nga një mashkull të cilit i rikthehet gjithnjë edhe pse ai ua copëton zemrën pas kësaj,… dhe askush nuk e kupton se përse dreqin i kthehen, bile as ato vetë, por ja që e bëjnë se nuk munden ndryshe…mendonte ajo derisa mbushte gotën e dytë me verë, por një zë thellë brenda vetes i thoshte se nuk do i kthehej më për herë të tretë atij.
Shiu vazhdonte të binte duke lagur kështu çdo pëllëmbe të qytetit që dikur e kishin ecur bashkë por asnjëherë dorë për dore.
Seç dëshiroi ta takonte vetëm sa për ti kujtuar ato kujtimet e pakta që copa copa tek tuk vareshin në memorien e saj si në tharëse teshash.
Seç dëshiroi ta takonte vetëm sa për ta parë veten në sytë e tij, ah ata sy si dy kokrra kafeje të errët Brazili.
Seç dëshironte ta takonte vetëm sa për t’i futur gishtat e njomë femërore në flokun e tij, dhe t’ ia rrëshqiste lehtas deri ne pjesën e poshtme të qafës ku i fshihej një nishan i vogël në anën e djathtë.
Seç dëshironte ta takonte vetëm sa për ta puthur fare pak atë faqe duke shpuar kështu buzët e saj nga mjekra e tij e sapombirë.
Seç dëshironte ta takonte vetëm sa për ti pëshpëritur se i dhembnin shumë gjithë ato momente lumturie që nuk i do i përjetonin kurrë.
Seç dëshironte ta takonte vetëm sa për ti thënë se ata të dy do të kishin fëmijë shumë të bukur…nëse…sikur…
***
Vera e saj gllënke pas gllënke po harxhohej derisa ajo priste që atë ta merrte malli për të.
Cigaret e tij ndizeshin e shuheshin një pas një derisa ai po mundohej ta harronte atë.
Këto MIQ, këto vija paralele mbase do puthiteshin ndonjëherë diku në përjetësi atje ku ndodhin gjërat e bukura… por këtu ku ndodhin ato të përkohshmet dhe të rrejshmet asnjëherë.
L.B.
Tregim i bukur Lira e dashur. Posacerisht pasuset qe nisin me “sec deshironte ta takonte”, aty je fort e natyrshme. Vazhdo, te uroj shume suksese. P.S dukesh qe je bija e shkrimtarit Fejzi, u rritem me poezite e tij, ti kuptohet akoma me shume je rritur ne frymen e tij. Me gezon qe emri Bojku ka vazhdimesine e vet!