Ahmeti në Çair: Kohëve të fundit shumë po ju ngelet hatri, por te unë kthim prapa nuk ka
Në orët e pasdites, Bashkimi Demokratik për Integrim organizoi një tubim në Çair, tubim ku në foltore u paraqitën ministrat e kësaj partie, kryeparlamentari Talat Xhaferi dhe kryetari i BDI-së, Ali Ahmeti, transmeton Portalb.mk.
“Kohëve të fundit shumë po ju ngelet hatri, por te unë kthim prapa ska! Unë respektoj vendimet e shumicës së organeve partiake, por unë nuk mund të dal nga rruga e trasuar me gjak e me vlera, ndaj një përshëndetje speciale shkon për bashkëluftëtarët e mi dhe familjet e dëshmorëve. Misioni ynë nisi për bashkim, për të ju dhënë shqiptarëve atë që e kanë merituar historikisht, lirinë, drejtësinë, barazinë, sepse fjala e lirë dhe mendimi pa kufi është anarki!”, deklaroi Ahmeti.
Ai deklaroi që është shumë krenar me ekipin e BDI-së në qeveri, duke theksuar që këto vlerësime vijnë edhe nga ndërkombëtarët.
“Asgje nuk filloi dhe nuk do të përfundoj as me mua e as me dikë tjetër, vetëm fryma e Ali Ahmetit duhet të jetë e përjetshme sepse është më e mira për shqiptarët”, deklaroi Artan Grubi, duke shtuar se “duam të mbahemi mend që i kemi qëndruar pranë rilindasit të fundit të popullit tonë, Ali Ahmetit”.
Disa figura të Bashkimit Demokratik për Integrim (BDI) në Çair, të njohur si “Grupi i Zjarrit” kishin organizuar tubim me qytetarët në Çair para një muaj, ku një nga kërkesat e tyre ishte edhe largimi i zëvendëskryeministrit Artan Grubi dhe ministrave që janë të afërt me atë.
“Nuk e merr seriozisht detyrën që ka, nuk mund ta mbron trashëgiminë iliro-dardano të Shkupit, as fëmijët e Velesit, as investimet kapitale, apo 25 përqind nga 400 milion euro investime. Edhe në kohën e Gruevskit me më pak pushtet kemi arritur më shumë se sa sot me gjithë këtë pushtet Artan Grubi”, kishte deklaruar deputeti Izet Mexhiti.
