Petrovska: Së bashku ne thyejmë stereotipet dhe krijojmë një sistem vlerash për barazinë gjinore në sektorin e sigurisë

Ministrja e Mbrojtjes Sllavjanka Petrovska sot foli në konferencën me titull “Uniformë, blind që nënkupton cenueshmëri – lufta jonë e përditshme në dy fronte” organizuar nga Ministria e Punës dhe Politikës Sociale, ku theksoi shembujt pozitivë të barazisë gjinore në mbrojtje dhe në Armatë dhe ndau fakte rreth perspektivës gjinore në zhvillim për gratë në uniformë.

“Për shumë vite, për fat të keq, kishte stereotipe se sektori i sigurisë, veçanërisht pozitat e larta drejtuese, ishin të rezervuara ekskluzivisht për burrat. Por me këmbënguljen, qëndrueshmërinë dhe mençurinë tonë ia dolëm ta ndryshonim këtë”, tha ministrja.

Petrovska informoi se në vitin 2012 përqindja e përfaqësimit të femrave me uniformë ishte 5,7%, ndërsa sot përqindja e përfaqësimit është 10,8%. Rritje të lartë, nënvizoi Petrovska, vërehet edhe në përqindjen e femrave oficere, e cila në vitin 2012 ishte vetëm 9%, ndërsa sot ajo përqindje është dyfishuar -18%. Në vitin 2012, vetëm një grua ka qenë kolonel – sot janë shtatë, ndërsa në Ministrinë e Mbrojtjes, përfaqësimi i përgjithshëm i grave është 47 për qind, dhe 48 për qind e pozitave drejtuese i zënë gratë.

Ministrja tha se megjithëse shifrat janë tregues se barazia gjinore po ecën në drejtimin e duhur, është veçanërisht e rëndësishme që gratë në mbrojtje dhe Armatë të jenë vërtetë të mirëpritura dhe në asnjë rast nuk duhet të nënçmohen, diskriminohen apo pengohen në zhvillimin e karrierës së tyre.

“Secila prej nesh është e gatshme të përballojë të gjitha sfidat me të cilat përballemi, të bëjë përpjekjet tona të plota dhe të jetë po aq e suksesshme, jo vetëm sepse ajo është grua, por sepse jemi vërtetë të afta për ta bërë këtë. Javën e kaluar kam nënshkruar emërimin e shefit të seksionit të parë femër në Shtabin e Përgjithshëm të Ushtrisë dhe nuk e kam bërë vetëm sepse ajo është grua, por sepse është një oficere që me të vërtetë ka kapacitete dhe vlera”, tha Petrovska.

Në hapje të konferencës u drejtuan ministrja e Punës dhe Politikës Sociale, Jovanka Trençevska, ministri i Punëve të Brendshme, Oliver Spasovski dhe dekani i Fakultetit të Sigurisë, Nikolla Dujovski. Gjatë konferencës, Kolonel Biljana Blazhevska, adjutante e Presidentit të Republikës së Maqedonisë së Veriut, si dhe nënkolonel Tome Peev dhe nënkolonel Aleksandra Donevska nga Armata e Republikës së Maqedonisë së Veriut ndanë përvojat e tyre.