Grubi ushtron presion në Prokurori që të mos hapet lëndë për krimin që ka bërë, akuzon VMRO-DPMNE

N. D. 11:39, 28-02-2023

Zëvendëskryeministri i parë Grubi është i frikësuar dhe i nervozuar sepse është kapur në krim të pastër, ndaj me të gjitha forcat ushtron presion në Prokurorinë Publike që të mos hapet asnjë lëndë për këtë rast, akuzon VMRO-DPMNE, transmeton Portalb.mk.

“Megjithatë, institucionet duhet të kapërcejnë dhe inkurajojnë dhe hetojnë se si është e mundur të blihet një hapësirë biznesi prej 127 metrash katrorë për vetëm 100 mijë euro në qendrën të kryeqytetit. Ose pesë herë më e ulët se çmimi i tregut. A ka marrë Grubi çmim preferencial dhe cila është arsyeja e këtij privilegji për zv/kryeministrin e parë për hapësirën e biznesit që bleu vëllai i tij. Po ashtu ka mbetur e paqart, ndërsa institucionet duhet të japin përgjigje nëse pagesa ka qenë me para të gatshme për të shmangur origjinën e parave, apo për ndonjë premtim tjetër për përfitim tjetër”, thanë nga VMRO-DPMNE.

Partia më e madhe opozitare shton se përpjekjet e dëshpëruara për defokusimin e Artan Grubit, të cilat ai i përdor përmes portaleve të tij në internet, nuk kalojnë.

“Është sekret i hapur që Grubi ka portalet e tij, të cilat më parë kanë qenë në emrin e tij, për përballje me disidentët dhe kundërshtarët e tij politikë. Selia dhe qendra koordinuese e këtyre portaleve është pikërisht në Ministrinë e Sistemit Politik dhe Marrëdhënieve ndërmjet bashkësive. Ndonëse institucionet heshtin me ditë për këtë skandal, VMRO-DPMNE do të vazhdojë të publikojë dëshmi për pasurimin e madh të familjes së zëvendëskryeministrit të parë Artan Grubi. Gjatë ditës së sotme do të publikojmë dyshime të reja, por edhe dëshmi se si përkthyesi nga ambasada dhe familja e tij u bënë një nga familjet më të pasura në vend”, thuhet në njoftimin e VMRO-DPMNE-së.

Dhjetë ditë më parë, Komisioni kundër korrupsionit hapi lëndë për zëvendëskryeministrin e parë në qeveri dhe ministrin për sistemin politik dhe marrëdhënie ndërjet bashkësive Artan Grubi.

Një veprim i tillë i KShPK-së vjen pasi VMRO-DPMNE-ja opozitare disa herë doli në publik me një sërë akuzash se Grubi dhe anëtarët e familjes së tij po pasurohen në kurriz të shtetit.

“Kemi një rast të hapur pas kallëzimit, po veprohet në lëndë. Kur të kemi informacione konkrete do të dalim publikisht”, tha KShPK në seancën e djeshme të rregullt.

VMRO-DPMNE-ja opozitare rreth dhjetë ditë më parë akuzoi se familja e Artan Grubit grumbullon miliona biznese dhe prona përmes vëllait të tij, i cili në mënyrë direkte ose indirekte është i lidhur me disa biznese, siç është edhe ai për kalibrimin e instrumenteve për derdhjen e derivateve të naftës dhe gazit.

Për vëllain e zëvendëskryeministrit të parë, Veton Grubin, VMRO-DPMNE ka akuzuar se ai posedon një hapësirë të madhe në rrugën “Maqedonia” në vlerë prej gjysmë milioni eurosh. Objekti me një sipërfaqe prej 127 metrash katrorë, sipas partisë opozitare, është blerë në kohën kur Grubi ishte zëvendëskryeministër në Qeveri.

BDI: Mickoski i izoluar dhe i vetmuar, anti NATO, anti BE dhe anti-shqiptar

Pasi partia opozitare akuzoi zëvendëskryeministrin e parë dhe familjen e tij për një sërë abuzimesh, ka reaguar BDI-ja nga ku thonë se Mickoski është i izoluar dhe i vetmuar, anti NATO dhe anti BE. Siç thonë nga BDI, ai duhet të tregojë se pse i ndaloi kryetarët e tij të komunave të bashkëpunojnë me shqiptarë dhe pse bën thirrje për luftë?

“I izoluar dhe i vetmuar anti NATO dhe BE, njëkohësisht edhe antishqiptar sipas qëndrimeve dhe vendimeve të tij, kryetari i VMRO DPMNE-së, Mickoski refuzon dhe shmang të deklarohet: Pse ua ka ndaluar kryetarëve të tij të komunave të bashkëpunojnë me shqiptarë, pse ka lëshuar urdhër që të mos lëshohen vendime për legalizim për shqiptarët nga ana kryetarëve të tij të komunave, pse ka lëshuar urdhër që të mos jepen leje ndërtimi për kompanitë pronari i të cilave është shqiptar dhe pse ai dhe bashkëpartiakët e tij bëjnë thirrje për luftë kundër shqiptarëve në vitin 2023?”, thonë nga BDI.

Mirëpo ajo që vërehet në reagimin e BDI-së, është se nuk i kundërshton akuzat e VMRO-së, por vetëm lëshon kundër-akuza.

“Publikimi i një fotoje me uniformë të kamufluar dhe me kallashnikov të zbarzur ishte paralajmërim i një fushate të planifikuar prej kohësh me paralajmërime për luftë nga VMRO DPMNE dhe me kërkesë për 61 deputetë që të mos ‘kushtëzohen’ nga shqiptarët, sikur Nikolla Gruevski dikur dhe nxiti fjalimin e Aleksandër Nikollovskit në Kuvend, gjatë të cilit ai deklaroi se maqedonasit do të ngrihen në vitin 2023. Kjo është sjellje skandaloze e liderëve të papërgjegjshëm të VMRO DPMNE-së dhe duhet të dënohet nga të gjithë, duke përfshirë mediat, shoqërinë civile, komunitetin akademik dhe të gjitha partitë që angazhohen për një Maqedoni Europiane, anëtare të NATO-s, me qytetarë të barabartë dhe në bashkëjetesë të shkëlqyeshme ndërmjet të gjitha komuniteteve, për paqe, stabilitet dhe siguri, si dhe zhvillim ekonomik. Sot, të gjitha partitë, përveç Levicës, po distancohen nga VMRO DPMNE-ja e Mickoskit dhe kapaciteti i saj koalicionues është i barabartë me ZERO dhe pikërisht kjo shkakton nervozizëm tek ta”, reaguan nga BDI.

VMRO-DPMNE prej disa ditësh akuzon se familja e Grubit ka biznes milionësh dhe pronë përmes vëllait të tij, i cili në mënyrë direkte apo indirekte është i lidhur me më shumë biznese, siç është edhe ai i kalibrimit të instrumenteve për mbushjen e derivateve të naftës dhe gasit.