Krijuesja shqiptare e ChatGPT-së, Mira Murati mendon se inteligjenca e artificiale duhet të rregullohet

Shqiptarja Mira Murati është shefe e teknologjisë në OpenAI, duke udhëhequr ekipet pas “DALL-E” ,e cila përdor Inteligjencën Artificiale (IA) për të krijuar vepra arti bazuar në kërkesa dhe ChatGPT, chatboti jashtëzakonisht i popullarizuar i IA që mund t’u përgjigjet pyetjeve komplekse me aftësi të frikshme njerëzore, transmeton Portalb.mk. Murati ka folur për TIME për dobësinë më të madhe të ChatGPT, potencialin e pashfrytëzuar të softuerit dhe pse është koha për të ecur drejt rregullimit të Inteligjencës Artificiale.

Sipas Muratit, ashtu si me revolucionet e tjera nëpër të cilat kemi kaluar, do të ketë vende të reja pune dhe disa vende pune do të humbasin.

Duke folur për sfidat gjatë punës me Chat GPT, Mira ka sqaruar se ChatGPT është në thelb model i madh bisedor, një rrjet i madh nervor që është trajnuar për të parashikuar fjalën tjetër dhe sfidat me të janë sfida të ngjashme që shohim me modelet bazë të gjuhëve të mëdha: mund të përbëjë fakte.

“Kjo është në fakt një sfidë thelbësore. Ne zgjodhëm dialogun veçanërisht sepse dialogu është një mënyrë për të bashkëvepruar me një model dhe për t’i dhënë atij reagime. Nëse mendojmë se përgjigjja e modelit është e pasaktë, mund të themi: “A je i sigurt? Unë mendoj se në të vërtetë…” Dhe më pas modeli ka një mundësi të bashkëveprojë me ju, ngjashëm me mënyrën se si do të bisedonim me një njeri tjetër”, ka thënë Murati.

Për atë se çfarë problemi po zgjidh ChatGPT, ajo ka sqaruar se tani për tani, është në fazën e rishikimit të kërkimit, dhe kështu nuk dëshiron të flas me besim të lartë se cilat probleme po zgjidh.

“Por unë mendoj se ne mund të shohim se ajo ka potencialin për të revolucionarizuar me të vërtetë mënyrën se si mësojmë. Njerëzit janë në klasa me, të themi, 30 persona. Të gjithë kanë prejardhje të ndryshme, mënyra të të mësuarit dhe të gjithë po marrin në thelb të njëjtën përmbajtje. Me mjete si ChatGPT, mund të bisedoni pafund me një model për të kuptuar një koncept në një mënyrë që i përshtatet nivelit tuaj të të kuptuarit. Ka potencial të jashtëzakonshëm për të na ndihmuar me edukimin e personalizuar”, ka thënë Mira.

Disa shkolla po ndalojnë përdorimin e ChatGPT-së, për këtë Mira thotë se “kur po zhvillojmë këto teknologji, ne vërtet po shtyhemi drejt inteligjencës së përgjithshme, aftësive të përgjithshme me besueshmëri të lartë – dhe e bëjmë këtë në mënyrë të sigurt”.

Por, sipas saj kur ajo hapet për sa më shumë njerëz që të jetë e mundur me prejardhje të ndryshme dhe ekspertizë të fushës, “patjetër që do të habiteni nga llojet e gjërave që ata bëjnë me teknologjinë, si në frontin pozitiv ashtu edhe në atë negativ”.

E pytetur për atë se një numër në rritje i liderëve në këtë fushë po paralajmërojnë për rreziqet e IA dhe se a ka ndonjë dyshim për teknologjinë, Murati thekson se teknologjia na formëson dhe ne e formësojmë atë.

“Ka shumë probleme të vështira për t’u kuptuar. Si e bëni modelin të bëjë atë që ju dëshironi dhe si siguroheni që të jetë në përputhje me qëllimin njerëzor dhe në fund të fundit në shërbim të njerëzimit? Ekzistojnë gjithashtu një sërë pyetjesh rreth ndikimit shoqëror, dhe ka shumë pyetje etike dhe filozofike që duhet t’i shqyrtojmë. Dhe është e rëndësishme që ne të sjellim zëra të ndryshëm, si filozofë, shkencëtarë socialë, artistë dhe njerëz nga shkencat humane”, tha Murati.

Mes tjerash ajo ka theksuar se IA mund të keqpërdoret, ose mund të përdoret nga aktorë të këqij. Ndërkaq mendon se është e rëndësishme që OpenAI dhe kompanitë si ajo ku Mira bën pjesë ta sjellin këtë në ndërgjegjen e publikut në një mënyrë të kontrolluar dhe të përgjegjshme.

“Por ne jemi një grup i vogël njerëzish dhe kemi nevojë për një ton më shumë kontribut në këtë sistem dhe shumë më tepër kontribut që shkon përtej teknologjive – padyshim rregullatorët dhe qeveritë dhe të gjithë të tjerët. Është shumë e rëndësishme që të gjithë të fillojnë të përfshihen, duke pasur parasysh ndikimin që do të kenë këto teknologji”, ka thënë Murati.

Një prej laboratorëve më ambiciozë në botë të inteligjencës artificiale, OpenAI është kompani e themeluar në fund të 2015-ës nga një grup investitorësh ku përfshiheshin themeluesi i Y Cominator Sam Altman dhe themeluesi i Tesla Elon Musk synimin për të promovuar zhvillimin e sistemeve miqësore të inteligjencës artificiale në përfitim të njerëzimit.

Që prej 2018-ës, pjesë e OpenAI u bë Mira Murati, shqiptarja e cila vjen nga qyteti i Vlorës dhe në Maj të këtij viti u emërua në pozitën e CTO duke mbikëqyrur operacionet teknologjike të kompanisë.

Kush në të vërtetë është Mira?

35-vjeçarja Mira Murati është diplomuar nga Shkolla e Inxhinierisë Thyer në Dartmouth të Masaçusets në SHBA në fushën e Inxhinierisë Mekanike.

Gjatë periudhës 2013-2016 ajo punoi pranë Tesla si Menaxhere e Lartë Produkti për seritë Model X përpara se të punonte për dy vite të tjera nga 2016-2018 për Leap Motion si zëvendës presidente e produktit dhe inxhinierisë.

Rrugëtimi i saj në OpenAI filloi si Zëvendës-Presidente e Inteligjencës Artificiale të Aplikuar dhe Partneriteteve për tu zhvendosur më pas si Zëvendës-Presidente e Kërkimit, Produktit dhe Partneriteteve. Në Maj të 2022 ajo u emërua si CTO e OpenAI.

Përndryshe, ChatGPT ka pushtuar imagjinatën e publikut pas publikimit të tij në fund të nëntorit. Ndërsa disa shkolla po e ndalojnë atë, Microsoft njoftoi një investim prej 10 miliardë dollarësh në kompani dhe Google lëshoi një “kod të kuq”, duke u shqetësuar se teknologjia mund të prishë biznesin e saj të kërkimit.