fbpx

“Frazeologjizmat popullore në Pollog”

“FRAZEOLOGJIZMAT POPULLORE NË POLLOG” (Pjesa e dytë) është libri i radhës i autorit Remzi Emshiu.

Gjuha e njësive frazeologjike ka veçoritë e të folmes popullore të Pollogut. Përdorimi i çdo njësie frazeologjike popullore është paraqitur në një fjali në gjuhën e popullit të trevës, më pas i është dhënë edhe shpjegimi në gjuhën standarde. Për arsye teknike dhe për të mos e rënduar tekstin, nuk e pamë të arsyeshme t’i japim të gjitha veçoritë dialektore të kësaj treve.

Pollogu, aq i pasur me krijime popullore nga më të ndryshmet, natyrisht është një trevë e pasur edhe me frazeologjizma, nëpërmjet të cilave, herë me një humor të lehtë, herë me një ironi të mprehtë, flitet për dukuri e vese të ndryshme, për virtyte të larta të njeriut tonë si dhe për raporte të ndryshme shoqërore.

Frazeologjizmat, si krijime të bukura e të fuqishme figurative, janë një thesar i çmuar i gjuhës sonë.

Pollogu është i pasur me shprehje frazeologjike të cilat janë ruajtur dhe ruhen edhe pse tani në masë më të vogël, sepse gjeneratat e vjetra po ndërrohen me të rejat dhe ruajtja e këtyre shprehjeve të bukura popullore frazeologjike, (fjalëve të urta, legjendave, këngëve popullore, anekdotave, riteve familjare etj.), është shumë e vështirë, si tërësi mund të ruhen vetëm të shkruara.

Në këtë vepër disa nga frazeologjizmat janë rezultat të anegdotave popullore, nëpërmjet të cilave shprehet një mendim i plotë, i mprehtë dhe i fuqishëm, që përgjithëson përvojën e shumë brezave dhe zakonisht përmban një mësim të urtësisë popullore për jetën, për një fakt historik a një raport shoqëror, për një botëkuptim a një normë morale, për një virtyt ose vese të ndryshme.

Mësimi, porosia dhe shprehja e mendimit shoqëror nëpërmjet njësive frazeologjike jepen në mënyrë të qartë, o drejtpërdrejt, o nëpërmjet një gjuhe specifike, simbolike, metaforike, duke ushtruar një ndikim mjaft të fuqishëm dhe të efektshëm emocional dhe edukativ te njeriu i sotëm.

Vepra “Frazeologjizmat popullore në Pollog” (pjesa e dytë) besoj se, edhe kështu siç është, do të jetë një ndihmesë e mirë për ata që e kanë në zemër studimin me themel të shqipes.

Përcaktimi im për këtë trevë, nuk do të thotë se ky thesar u përket vetëm krijuesve popullor të Pollogut. Përkundrazi, këto frazeologjizma mund të merren si pasuri e përbashkët e gjithë popullit shqiptar, sepse, siç dihet, ato kanë një shtrirje të gjerë në të gjitha trevat e banuar me shqiptar.

Shfrytëzoj nga rasti që t’ju shpreh mirënjohje të gjithë rrëfyesëve popullor dhe recensuesve për vlerësimin e tyre.

Tags

Lajme të ngjashme

Back to top button
Close